निर्माण कार्य नसकिँदै भत्किन थाल्यो ढल

होमनाथ सापकोटा
रत्ननगर । रत्ननगरको टाँडी बजारक्षेत्रमा सुरू गरिएको ढल निर्माण कार्यमा चरम लापरवाही भएको सरोकारवालाको आरोप छ । ढल निर्माण कार्य नसकिँदै भत्किन थालेपछि कमसल सामग्री प्रयोग गरिएको भन्दै ठेकेदार पक्षलाई लापरवाहीको आरोप लागेको हो ।
सडक डिभिजन कार्यालय भरतपुरले ढल निर्माण गरेको भएपनि जिम्मेवार संस्था नगरपालिकाले नियमित अनुगमन गर्नु पर्दथ्यो । तर नगरपालिकाले सडक डिभिजन कार्यालयको काम हो भन्दै अनुगमन पनि नगरेपछि ढल निर्माणमा लापरवाही भएको स्थानीय शुभप्रभात टोल विकास संस्थाका अध्यक्ष ज्ञानेन्द्रराज पाण्डेले आरोप लगाउनुभयो ।
‘सडकलाई देखाएर नगरपालिकाले अनुगमन नगरेकै कारण ठेकेदारले लापरवाही गरेको हो’, उहाँले भन्नुभयो, ‘कमसल सामग्री प्रयोग गरी बनाइएको ढलले नगरपालिकालाई नै असर गर्छ । अनुगमन नगरिएकै कारण निर्माणको ठेक्का लिएको ठेकेदारले कमसल सामग्री प्रयोग गरी ढल निर्माण गरेको छ । कतै सिमेन्ट कम प्रयोग गर्ने र कतै गुणस्तरहीन इँटा प्रयोग गर्दा निर्माण कार्य नसकिँदै ढल भत्किन थालिसकेको छ ।’
एक वर्षअघिबाट निर्माण कार्य सुरू भएको सो ढल ६ महिनाभित्र सक्ने सहमति भएको थियो । तर एक वर्ष वितिसक्दा पनि निर्माण कार्य पूरा हुन सकेको छैन । रत्ननगरमा ढल निर्माणको लागि सडक डिभिजन कार्यालय भरतपुरले विराज शक्ति शिव एनपी कम्पनीलाई ठेक्का दिएको थियो ।
ढल निर्माणको लागि ठेक्कामाथि ठेक्का दिइएको कारण निर्माण कार्य प्रभावकारी हुन नसकेको उपभोक्ताहरुको भनाइ छ । ‘ढल निर्माणको काम भइरहेको छ, निर्माण सामग्री राम्रो भएन भनेर ठेकेदारलाई खोज्दा कोही भेटिँदैन’, रत्ननगर नगरपालिकाका संस्थापक नगर प्रमुख नारायण वनले भन्नुभयो, ‘यहाँ त ठेक्कामाथि ठेक्का चलेको छ ।’
ढल निर्माणको काम अहिलेसम्म ८० प्रतिशत सकिएको सडक डिभिजन कार्यालयले दावी गर्दै आएको भएपनि धेरैजसो ठाउँमा स्ल्याप हालिएको छैन । नाली र स्ल्याब बनाउँदा पनि ठेकेदारले कमसल सामग्री प्रयोग गरेको भन्दै उपभोक्ताहरुले विरोधसमेत जनाएका छन् ।
स्ल्याब हालेको केही दिनमै फुट्न थालेको छ । कमसल सामग्री प्रयोग गरेको पाइएपछि उपभोक्ताहरुले ढल निर्माणकै क्रममा टाँडी र बकुलहरमा बनाइएको नाला र स्ल्याब भत्काएर विरोध जनाएका थिए ।
‘बालुवामा सिमेन्टी प्रयोग नगरेको पाइयो’, संस्थापक नगरप्रमुख वनले भन्नुभयो, ‘इँटा पानी पर्दा फुट्ने खालको प्रयोग गरिएको थियो ।’ उहाँले सबै ठाउँमा यस्तै सामग्री प्रयोग गरेको भए ढल एक वर्ष पनि नटिक्ने बताउनुभयो ।
रत्ननगरको बकुलहरदेखि टाँडीचोकसम्म राजमार्गको दुवैतर्फ ढल निर्माणको काम भइरहेको छ । ढल निर्माणको लागि सडक डिभिजन कार्यालयले ४३ लाखमा ठेकेदारलाई जिम्मा दिएको थियो । ठेकेदारले निर्माणको लागि पैसा अपुग भएपछि कमसल सामग्री प्रयोग गरेको पाइएको छ ।
सडक डिभिजन कार्यालय भरतपुरका इन्जिनियर शौरभ बज्राचार्यले कुनैकुनै ठाउँमा कमसल सामग्री प्रयोग गरेको पाइएकाले ठेकेदारलाई सचेत बनाइएको बताउनुभयो । अन्य ठाउँमा भने ढल निर्माण कार्य प्रभावकारी रुपले भइरहेको उहाँको भनाइ छ । बज्राचार्यले नगरवासीको दबाबका कारण स्ल्याप सेट नभई प्रयोग गर्नुपर्ने बाध्यताका कारण स्ल्याप फुटेको दावी गर्नुभयो ।
नगरपालिकाका निमित्त कार्यकारी अधिकृत सीताराम पोखरेलले ढल निर्माणको क्रममा लापरवाही भएको गुनासो आउन थालेपछि पछिल्लो समय नगरपालिकाले पनि अनुगमन गर्न थालेको बताउनुभयो ।

सभासद र महानिर्देशकबीच भनाभन
रत्ननगरको ढल निर्माणको विषयलाई लिएर चितवन क्षेत्र नंं.२ का सभासद् शेषनाथ अधिकारी र सडक विभागका महानिर्देशक देवेन्द्र कार्कीबीच भनाभन भएको छ । ‘गुणस्तरहीन काम भयो, राम्रोसँग गर्नुहोस् भन्दा महानिर्देशक ममाथि खनिए’, सभासद् अधिकारीले बताउनुभयो ।
‘काम राम्रो हुनुप¥यो भन्दा उपभोक्ताले काम गर्न दिँदैन्न भनेर महानिर्देशक कडकिनु भो’, सभासद् अधिकारीले भन्नुभयो, ‘मैले भने, टाँडीवासीले काम गर्न रोक्दैनन् । तर तपाईहरुले राम्रो काम गर्नुप¥यो ।’ उहाँले गुणस्तरीय काम गर्ने विषयमा महानिर्देशकलगायतका व्यक्तिहरु गम्भीर नभएका कारण प्रभावकारी काम हुन नसकेको बताउनुभयो ।