माडी । चितवनको माडी क्षेत्र पनि नगरपालिका घोषित हुने भएको छ । जिल्लास्तरीय नगरक्षेत्र निर्धारण तथा सिफारिस समितिले माडीका चारवटै गाविसहरु समेटी माडी नगरपालिका बनाउन नेपाल सरकारलाई सिफारिस गरेसँगै त्यसको तयारी भएको हो ।
नगरपालिकाको केन्द्र हालको बघौडा गाविस वडा नं ३ रहेको बसन्तपुर बजार रहने तथा हालका चारवटै गाविसहरुमा ३÷३ वटा वडा कायम हुने प्रस्ताव गरिएको छ । कुल १२ वटा वटा वडाहरु रहनेगरी २१८ वर्ग किलोमिटर क्षेत्रमा फैलने माडी नगरपालिकाले पूर्वमा बाँदरझुलादेखि पश्चिममा वाल्मीकि आश्रमलाई समेट्ने छ । गत २०६८ को जनगणना अनुसार यस क्षेत्रको स्थायी जनसङ्ख्या ३७ हजार ६८३ रहेको छ ।
त्यसैगरी माडीसँगै शुक्रनगर, अमृतनगर र टाँडी समेटी नारायणी नगरपालिकाको नामबाट चितवनमै अर्को एक नयाँ नगरपालिका थप्ने तथा भरतपुर नगरपालिकाको क्षेत्र बिस्तार भई उपमहानगरपालिका हुने प्रस्ताव गरिएको छ ।
प्रस्तावित नारायणी नगरपालिका र भरतपुर उपमहानगरपालिकाले क्रमशः १२ वटा वडाहरु समेट्दै ७२.६ तथा २९ वटा वडाहरु समेटी २४२.३ वर्गकिलोमिटर क्षेत्र ओगट्ने छन् भने त्यहाँको अनुमानित जनसंख्या क्रमशः ३९ हजार ९०७ र १ लाख ९९ हजार ९०७ रहने छ । भरतपुरँंगै इटहरी, जनकपुर, हेटौंडा, बुटवल, नेपालगञ्ज र धरानलाई समेत उपमहानगरपालिका बनाउन प्रस्ताव गरिएको छ ।
सरकारले गत वैशाख २५ गते ७२ वटा नयाँ नगरपालिका घोषणा गरेको तीन महिना नपुग्दै थप ६१ वटा नगरपालिका घोषणाको तयारी गरेको हो । हाल प्रस्तावित नगरपालिकाहरुका लागि सरकारले विशेष मापदण्ड लागू गरेको छ ।
जसअनुसार तराई तथा भित्री मधेशक्षेत्रका प्रस्तावित नगरपालिकाहरुमा न्यूनतम् २० हजार जनसंख्या र वार्षिक आयश्रोत न्यूनतम् ५० लाख रुपैयाँ निर्धारण गरेको छ । त्यसैगरी उक्त स्थानमा सडको पहुँच, शैक्षिक अवस्था, स्वास्थ्य सुविधा, खानेपानी, फोहोरमैला व्यवस्थापन, होटल, पार्कको सुविधा, खेल मैदानको उपलब्धता आदि मापदण्डहरु पनि पूरा गरेको हुनुपर्ने व्यवस्था रहेको छ ।
Discussion about this post