भरतपुर । चितवन जिल्लामा कोरोना (कोभिड–१९) सङ्क्रमणको संख्या विस्तारै बढ्न सुरू गरेको छ । बुधबार एकैदिन ११ जना कोरोना भाइरसबाट सङ्क्रमित भएका छन् । स्वास्थ्य कार्यालयले दिएको तथ्याङ्कअनुसार मंगलबारसम्म चितवनमा ४० जना सक्रिय कोरोना सङ्क्रमित रहेका थिए ।
बुधबार पुगेका ५० जना सक्रिय सङ्क्रमितमध्ये ४२ जना होम आइसोलेसनमा रहेका छन् भने आठ जना अस्पतालमा उपचाररत अवस्थामा छन् । ५० जना सङ्क्रमितमध्ये ४५ जना भरतपुर महानगरभित्रका हुन् । खैरहनी नगरपालिकामा ३ जना र बाँकी २ जना रत्ननगर नगरपालिकाका हुन् ।
चितवनमा हालसम्म कोरोना सङ्क्रमितको संख्या ६ हजार ९५४ जना पुगेका छन् । गत वर्ष फागुन १११ जनाको कोरोनाको सङ्क्रमणबाट मृत्यु भइसकेको छ ।
देशभर पछिल्लो २४ घन्टामा थप २९८ जनामा कोरोना सङ्क्रमण पुष्टि भएको छ । स्वास्थ्य तथा जनसंख्या मन्त्रालयका अनुसार पछिल्लो समय चार हजार १०० जनाको स्वास्थ्य परीक्षण गर्दा सो संख्यामा सङ्क्रमण पुष्टि भएको हो ।
काठमाडौँ उपत्यकामा पछिल्लो समय १६३ जनामा कोरोना सङ्क्रमण देखिएको छ । मन्त्रालयका अनुसार काठमाडौँमा ९८, ललितपुरमा २६, भक्तपुरमा १३, र कास्कीमा १९ जना रहेका छन् । बुधबारसम्म नेपालमा कोरोना भाइरस सङ्क्रमितको संख्या दुई लाख ७८ हजार ७६८ पुगेको छ । त्यस्तै पछिल्लो समय थप ७४ जना निको भएका छन् । योसँगै निको हुनेको संख्या दुई लाख ७३ हजार ५२९ रहेको छ । निको हुने दर भने ९८ दशमलव १ प्रतिशत रहेको छ ।
हाल देशभर सक्रिय सङ्क्रमितको संख्या दुई हजार २०१ रहेको छ । उनीहरुमध्ये ६५ जना क्वारेन्टाइनमा रहेका छन् भने अन्य आइसोलेसनमा रहेका छन् ।
हालसम्म नेपालमा २२ लाख ९८ हजार १६७ को पिसिआर परीक्षण भएको छ । त्यस्तै तीन हजार ३८ जनाले कोरोनाका कारण ज्यान गुमाएको मन्त्रालयले जनाएको छ । त्यस्तै पछिल्लो २४ घन्टामा एक जना र पहिले नै मृत्यु भएका दुई जनाको बुधबार कोरोनाबाट मृत्यु भएको पुष्टि गरिएको छ ।
स्वास्थ्य तथा जनसंख्या मन्त्रालयले कोरोना सङ्क्रमणको संख्या बढेको हुनाले रात्रिकालीन व्यवसाय तथा रेष्टुरेन्टहरु राति ९ बजेपछि बन्द गर्न सबैमा अनुरोध गरेको छ । मन्त्रालयले कोरोनाको जोखिम बढेका ठूला सहरमा सार्वजनिक यातायातको यात्रा गर्न र भीडभाड कम गर्न आग्रह गरेको छ ।
स्वास्थ्य तथा जनसंख्या मन्त्रालयका सहप्रवक्ता डा समिरकुमार अधिकारीद्वारा हस्ताक्षरित विज्ञप्तिमा बढी भीडभाड र जोखिम बढ्न सक्ने स्थानहरु शपिङ मल, नाचघर, सिनेमा घर, पार्टी प्यालेस, मन्दिर, स्वीमिङ पुललगायतका क्षेत्रहरुले जनस्वास्थ्यका मापदण्डहरु अति कडाइका साथ पालना गरेरमात्र सञ्चालन गर्न अनुरोध गरेको छ ।
यस्तै, विज्ञप्तिमा घरबाहिर र सार्वजनिक स्थानहरुमा मास्कको प्रयोगलाई अनिवार्य गर्न पनि अनुरोध गरिएको छ । विज्ञप्तिमा विदेशबाट फर्केर घरभित्रै क्वारेन्टाइनमा रहेका र कोरोना सङ्क्रमित भएर घरमै बसेकाहरुले तोकिएका मापदण्डहरु पालना गर्न अनुरोध गरिएको छ ।
Discussion about this post