माडी । चितवनको दुर्गम मानिने चितवनको माडीमा सञ्चालित दिवाकर स्मृति प्राविधिक शिक्षालय देशकै नमुना प्राविधिक शिक्षालयका रुपमा चिनिन थालेको छ । विसं २०७५ बाट प्राविधिक शिक्षा तथा व्यावसायिक तालिम परिषद् (सिटिइभिटी)को आङ्गिक कलेजको रुपमा सञ्चालन हुँदै आएको सो शिक्षालयमा चितवन, नवलपरासी, पर्सा, बारा, लमजुङ, तनहुँ, गोरखालगायतका जिल्लाबाट अध्ययनका लागि विद्यार्थी आएका छन् ।
माडी नगरपालिका–६, हरिनगरस्थित आधारभूत (१–८) विद्यालय जनकल्याण माविमा मर्ज भएपछि सोही विद्यालयमा शिक्षालय स्थापना भएको हो । सातवटा प्रदेशका उत्कृष्टमध्ये एक दिवाकर स्मृति प्राविधिक शिक्षालयमा सिभिल इन्जिनियरिङ र एग्रिकल्चर (पशु विज्ञान), एनिमल साइन्स र फार्मेसी संकाय सञ्चालन भइरहेको छ ।
शिक्षालयमा हाल डिप्लोमा तहको सिभिल इन्जिनियरिङतर्फ ३९ जना र एग्रिकल्चर (पशु विज्ञान)तर्फ २९ जना अध्ययनरत छन् । ५५ हजार १ सय रूपैयाँमा तीनवर्षे कोर्ष पूरा हुनेछ । एग्रिकल्चरतर्फ बाली विज्ञान र इन्जिनियरिङतर्फ इलेक्ट्रिकलका शैक्षिक कार्यक्रम थप गरिँदैछ ।
शिक्षालयले छोेटो अवधिका तालिमसमेत दिँदै आएको छ । टेलरिङ, ब्युटिसियन, मेसन, इलेक्ट्रिकल, प्लम्बिङका कक्षा चलाएको छ । तालिममा स्थानीय १ सय ८० जना सहभागी छन् । यस्तै, माडी नगरपालिकाको आयोजना र शिक्षालयको समन्वयमा सिन्के धूप बनाउने २ हप्ते तालिमसमेत चलाइएको छ । ‘सीप सिकाउने काम पनि गरेका छौँ’, प्रधानाध्यापक ऋषिराम काफ्लेले भने ।
स्थानीय निकायसँगको समन्वयमा प्रदेश कार्यालयसँग सम्झौता गरी बेमौसमी तरकारीखेती तालिम, डकर्मी तालिम, केयर गिभर तालिम, टेलरिङसम्बन्धी तालिम, ग्रामीण पशु स्वास्थ्य कार्यकर्ता तालिम, निर्माणकर्मी, बिल्डिङ इलेक्ट्रिकसम्बन्धी तालिम प्रदान गरिने शिक्षालयका प्रमुख पुष्पराज पौडेलले बताए ।
शिक्षालयको ५ बिघा जग्गा आफ्नै स्वामित्वमा छ । यस्तै, साढे ३ बिघा जग्गा भोगचलन गर्ने अधिकार पाएको छ । हरिनगर विद्यालयको १३ कोठे भवन प्रयोगमा छ । शैक्षिक भवनमा ५० कोठा, प्रशासनिक भवनमा २० कोठा, लाइब्रेरी भवन ६ कोठा, २० वटा क्वाटर भवन, अतिथि गृह, होस्टल बनाइएको उनले बताए ।
माछा पोखरी ,गाईभैँसी गोठ, बाख्रा–सुँगुर–खरायोलगायतका खोरहरु, कृषि फार्म, पशु स्वास्थ्य क्लिनिकलगायतका पूर्वाधार बनाउने यस्तै कार्पेन्टिङ, प्लम्बिङ, सेट हाउस निर्माण गर्ने योजना रहेको बताए । भौतिक, रसायन, जीव, वनस्पतिशास्त्र, प्लम्बिङ, मेसनलगायतका सामान्य प्रयोगशाला तयार भइसकेका छन् । इलेक्ट्रिकल, कार्पेन्टिङ वर्कसप कम्प्युटर ल्याब बन्दैछन् । ३ वर्षभित्र एग्रिकल्चरतर्फ बाली विज्ञान र इन्जिनियरिङतर्फ इलेक्ट्रिकल शैक्षिक कार्यक्रम सञ्चालन गर्ने लक्ष्य रहेको उनले बताए ।
‘सबैका लागि शिक्षा’ हाम्रो नारा हो । हाम्रो मूल उद्देश्य विद्यार्थी विद्यार्थीजस्तै होऊन् र माडीका सामुदायिक विद्यालयबाट उत्पादित विद्यार्थी विश्व बजारमा सहजै बिक्न सकून् भन्ने हो’, नगरप्रमुख ढाकुर ढकालले भने ।
माडी स्थायी घर भएका १८ जनालाई जनही ५० प्रतिशत नगरपालिकाले खर्च व्यहोरेको छ भने पूरा कोर्ष १ लाख १० हजारमा नै पढ्ने व्यवस्था गरिएको छ । यो हिसाबले ५५ हजारमा माडीका विद्यार्थीले प्राविधिक शिक्षा अध्ययन गर्न पाइरहेका छन् । आर्थिक अवस्था कमजोर भएका विद्यार्थी छन् भने नगरपालिकाले पूरा खर्च व्यहोर्ने गरेको नगरप्रमुख ढकाल बताउँछन् । चालू आर्थिक वर्षमा त्यस्ता ३ जनालाई उक्त व्यवस्था गरिएको छ ।
Discussion about this post