रत्ननगर । एकल महिला तथा यौनिक अल्पसंख्यकको अधिकारका विषयमा रत्ननगरमा मंगलबार अन्तक्र्रिया तथा प्रशिक्षण कार्यक्रम गरिएको छ ।
रत्ननगर नगरपालिका, महिला, बालबालिका तथा ज्येष्ठ नागरिक शाखाले आयोजना गरेको सो कार्यक्रमको उद्घाटन गर्दै मेयर नारायण वनले आरक्षणभन्दा पनि रोजगार तथा सीपमूलक कार्यक्रमले मात्र मानिसको जीवन सहज हुने बताए । ‘अधिकारसँगै राज्यबाट अवसरको खोजी गर्नुपर्छ’, मेयर वनले भने, ‘त्यसो गर्न सकियो भनेमात्रै जीवन सार्थक बन्न सक्छ ।’
प्रदेशस्तरीय एकल महिला समन्वय समितिकी अध्यक्ष विष्णुकुमारी पाण्डेले एकल महिला तथा यौनिक अल्पसंख्यकहरुको अवस्था, अधिकार र पहुँचको विषयमा सहजीकरण गरेकी थिइन् । उपमेयर विमला दुवाडीको अध्यक्षतामा भएको कार्यक्रममा प्रमुख प्रशासकीय अधिकृत शिशिर पौडेल, महिला विकास अधिकृत दीपा घिमिरेलगायतले मन्तव्य राखेका थिए ।
गीता देवकोटाले संयोजन गरेको कार्यक्रममा ५२ जनाको सहभागिता रहेको महिला विकास निरीक्षक रञ्जना पौडेलले जानकारी दिइन् ।
Discussion about this post