‘तीज भड्किलो नबनाऊ’

भरतपुर । जिल्ला प्रशासन कार्यालय चितवनले सवै व्यक्ति तथा संघसंस्थालाई तीज भड्किलो नबनाउन आग्रह गरेको छ । प्रशासनले नजिकिँदै गरेको हरितालिका तीजलाई संस्कृति र सामाजिक मर्यादाअनुसार मनाउन आग्रह गरेको छ ।
कार्यालयले सोमबार सूचना जारी गरी पर्वका नाममा तडकभडक र खर्चिलो तरिका नअपनाउन भनेको छ । ‘ऐन नियमविपरीत हुने गरी कोही कसैले अनावश्यक तामझाम, तडकभडक र खर्चिलो हुने गरी तीज गीतका कार्यक्रम गरे गराएमा कानुनबमोजिम कारबाही हुनेछ’ प्रशासकीय अधिकृत शेषकान्त पौडेलले जारी गरेको सूचनामा भनिएको छ ।
यसको जिल्ला प्रशासन कार्यालय, प्रहरी र आन्तरिक राजस्व कार्यालयले समेत नियमित अनुगमन गर्ने भएको छ । कार्यालयको आग्रहलाई बेवास्ता गरी सामाजिक रूपमा विकृति ल्याउने प्रयास गरिएको भेटिएमा सामाजिक व्यवहार सुधार ऐन र नियमावली २०३३ बमोजिम कारबाही गर्ने चेतावनी जिप्रकाले दिएको छ ।