एकजना साक्षर हुन रु.चार सय सात खर्च

–बसन्त पराजुली
भरतपुर । साक्षर चितवन घोषणा गर्ने तयारी गरिरहेको चितवनमा एकजना निरक्षरलाई साक्षर बनाउन सरकारले ४०७ रुपैयाँ खर्च गरेको छ । चितवनमा विगत दुई वर्षमा साक्षरताका लागि भएको खर्च र साक्षरताको अवस्थालाई हेर्दा यो तथ्य देखिएको हो ।
चितवनमा यो अभियान ०६९÷०७० बाट सघन रुपमा सुरू भएको हो । २०६९ पुस १० गते बसेको जिल्ला शिक्षा समितिको बैठकले जिल्लालाई पूर्ण साक्षर बनाउने गरी साक्षर चितवन अभियान सञ्चालन गरेको थियो । साक्षर नेपाल अभियानअन्तर्गत साक्षर चितवन सञ्चालनमा ल्याएको हो ।
विगत दुई वर्षयता चितवनमा ७३ हजार २५० जनालाई साक्षर बनाइएको जिल्ला शिक्षा कार्यालय चितवनको तथ्याङ्क छ । जसका लागि अभियानअन्तर्गत दुई करोड ९८ लाख रुपैयाँ खर्च गरिएको छ ।
९५ प्रतिशत साक्षर भएको स्थान वा ठाउँलाई साक्षरताका हिसाबले पूर्ण साक्षर क्षेत्र घोषणा गर्न सकिने व्यवस्था छ । साक्षरता अभियानअन्तर्गत जिल्ला शिक्षा कार्यालय चितवनले गएको आर्थिक वर्षमा एक हजार सात सय ७३ कक्षा सञ्चालन गरेको थियो । जसबाट ४३ हजार ७०० जनालाई साक्षर बनाएको थियो ।
यो वर्ष दुई करोड ३२ लाख रुपैयाँ खर्च भएको देखिन्छ । अघिल्लो आर्थिक वर्ष ०६९÷७० मा भने चितवनमा सञ्चालित कार्यक्रमबाट २९ हजार ५५० साक्षर भएका थिए । जसका लागि ६६ लाख १५ हजार रुपैयाँ खर्च भएको जिल्ला शिक्षा कार्यालय चितवनको तथ्याङ्क छ ।
यसरी खर्च गरिएको रकम शिक्षिकाको तलब, भत्ता, कार्यालयको मसलन्द तथा अनुगमन भत्ता र सहभागीका लागि कापी किताबमा खर्च गरिएको देखिन्छ । जिल्ला शिक्षा कार्यालय चितवनमा साक्षरता अभियान हेर्ने विद्यालय निरीक्षक बाबुराम दवाडी चितवनमा निरक्षरहरुलाई साक्षर बनाउन कार्यालय सफल भएको दावी गर्नुहुन्छ ।
‘हामीले जे जति रकम खर्च गरेर भए पनि निरक्षरलाई साक्षर बनाउन सकेका छांै’, उहाँले भन्नुभयो, ‘चितवनमा साक्षरता अभियान सफल भएको छ ।’
शिक्षा दिवसमा साक्षरता जिल्ला घोषणा
यस वर्ष परेको शिक्षा दिवसका अवसरमा चितवनलाई साक्षर जिल्ला घोषणा गर्ने तयारी भइरहेको छ । जिल्ला शिक्षा समितिले जिल्लालाई पूर्णसाक्षर बनाउन लागेको हो ।
यस वर्षको शिक्षा तथा साक्षरता दिवस भदौ २३ मा परेको छ । साक्षर अभियानअन्तर्गत चितवनलाई साक्षर घोषणा गराउन विगत दुई वर्षदेखि साक्षर चितवन अभियान सञ्चालनमा रहेको छ ।
सन् २०१५ सम्ममा सबैलाई साक्षर बनाउने अभियानअन्तर्गत चितवनमा २०६४÷६५ बाट राष्ट्रिय साक्षरता कार्यक्रम सुरू भएको हो । चितवनमा भरतपुर नगरपालिका र ६ वटा गाविस साक्षर घोषणा हुन बाँकी छन् । अन्य तीन नगरपालिका र २५ गाविस भने यसअघि नै साक्षर घोषणा भइसकेका छन् ।
जिल्लामा चार नगरपालिका र ३१ गाउँ विकास समिति रहेका छन् ।