उदाहरणीय बन्दै सैनिक आवासीय महाविद्यालय

चैनपुर । हुने बिरूवाको चिल्लो पात भनेझैँ चितवनको चैनपुरमा सञ्चालनमा रहेको सैनिक आवासीय महाविद्यालय स्थापनाको छोटो अवधिमै उदाहरणीय बन्दै गएको छ ।
विद्यालयले छात्रछात्रालाई व्यावहारिक र विषयवस्तुबारे पूर्णरुपमा जानकारी गराउन विद्यालयका पाठ्यक्रममा सामाविष्ट लेखक र रचनाका सम्बन्धित स्रष्टाबाट नै ज्ञान हासिल गर्ने कार्यको थालनीसमेत गरिसकेको छ । विद्यालयले युग सुहाउँदो शिक्षा प्रदान गर्ने उद्देश्यका साथ विज्ञान, भाषा, सामाजिक अध्ययन र कम्प्युटरको प्रयोगशाला स्थापना गरी विद्यार्थीलाई अभ्यास सिकाइमा जोड दिएको छ ।
विद्यार्थीले आधुनिक शिक्षा समयसापेक्ष प्रविधिका माध्यमबाट सजिलोसँग बुझ्न सकून् भनेर पावर प्वाइन्टका माध्यमबाट पठाइ सञ्चालन गर्दै आएको छ । पढाइसँगसँगै विद्यार्थीलाई शब्द भण्डार बढाउन लगाउनुका साथै मुलुकका विशिष्ट व्यक्तिबाट विभिन्न समय र कालखण्डमा अभिव्यक्त भएका महानवाणी तथा स्लोगनलाई कण्ठ गराउने कार्यलाई विद्यालयले प्राथमिकतामा राखेको छ ।
अनुशासन र व्यावहारिक शिक्षाको अतिरिक्त शारीरिक व्यायाम तथा राष्ट्र र राष्ट्रियताबारे समेत विद्यार्थीहरुलाई विद्यालय तहदेखि नै ज्ञान लिने परिपाटीको उक्त विद्यालयले विकास गरेको छ ।
आगामी पाँच वर्षभित्र चितवन जिल्लामा गुणस्तरीय शिक्षा प्रदान गर्ने विद्यालयको नमुनाका रुपमा आफूलाई उभ्याउने सोचका साथ विद्यालयको शैक्षिक गुणस्तर र व्यवस्थापनलाई चुस्त बनाएर लैजान लक्ष्य निर्धारण गरिएको प्रधानाध्यापक बिमलकुमार क्षेत्रीले बताउनुभयो ।
छात्रहरुका लागि मात्र हाल आवासीय सेवा दिँदै आएको उक्त विद्यालयले निकट भविष्यमै छात्राका लागि पनि आवासीय गरिनुपर्ने स्थानीयको मागलाई सम्बोधन गर्ने सोचमा रहेको प्रधानाध्यापक क्षेत्रीले जानकारी दिनुभयो । नेपाली सेनाको कल्याणकारी कोष मातहत सञ्चालनमा रहेको उक्त विद्यालय २०६९ सालमा स्थापना भएको हो ।
नेपाली सेनाका बहालवाला, वीरगति प्राप्त र अवकाश प्राप्त तथा गैरसैनिक नागरिकका छोराछोरीलाई गुणस्तरीय र सुलभ शिक्षा प्रदान गर्ने उद्देश्यले स्थापना गरिएको उक्त विद्यालयमा हाल कक्षा ६, ७ र ८ मा गरी ३५६ जना छात्रछात्रा अध्ययनरत छन् । सो विद्यालयमा हाल द्वन्द्वपीडितका दुईजना सन्ततिले आश्रय लिइरहेको बताइएको छ ।
पठनपाठनलाई गुणस्तरीय तुल्याउन र विद्यार्थी शैक्षिक आत्मबल बढाउन रचनात्मक ढङ्गबाट सिकाइ पद्धति दिलाउने उद्देश्यले विद्यार्थीलाई विद्यालयले नेपाली र अङ्ग्रेजी हस्तलेखन, वादविवाद, निबन्ध लेखन, कविता, हाजिरीजवाफ, हिज्जे, भित्तेलेखन र पावर प्वाइन्ट प्रतियोगिता गराउँदै आएको छ ।
विद्यालयले यसै वर्षदेखि फुटबल, बास्केटबल, टेबलटेनिस, भलिबल, तेक्वान्दो लगायतका जिल्लास्तरीय खेलकुद प्रतियोगितामा विद्यार्थीलाई सहभागी गराउने तयारी गरेको छ ।
लोक नृत्य, सामूहिक नृत्य, गायन र चित्रकला प्रतियोगितालाई विद्यालयले नियमिता दिँदै आएको छ । राष्ट्रिय बाल दिवस २०७० को उपलक्ष्यमा भरतपुरमा आयोजना भएको बृहद् बालगीत प्रतियोगितामा त्यस विद्यालयका छात्रछात्राले दोस्रो स्थानसमेत हासिल गर्न सफल भएका थिए । त्यस्तै चित्रकला प्रतियोगितामा समेत विद्यालयका दुईजना छात्रछात्राले तृतीय स्थान जितेका थिए ।
शैक्षिक गुणस्तर अभिवृद्धि गर्न नवीनतम् प्रविधिको प्रयोग गरी विद्यार्थीलाई ज्ञान दिलाउने तथा नयाँ जानकारी दिलाउन शब्द भण्डार र इतिहासमा आज भन्ने स्थायी स्तम्भबारे जानकारी गराइँदै आएको विद्यालयका शिक्षक सुरजचन्द्र गौतमले जानकारी दिनुभयो ।
त्यस विद्यालयबाट उत्पादित जनशक्ति समाजका सबै क्षेत्रमा सजिलैसँग बिक्न सकून् भन्ने ढङ्गबाट त्यहीअनुरुपको पाठ्यक्रम र व्यावहारिक ज्ञान दिने विषयमा व्यवस्थापन सचेत रहेको नेपाली सेनाबाट त्यहाँ खटिनुभएका सम्पर्क अधिकृत सन्दीपसिंह नेगीले बताउनुभयो । आउँदो १० वर्षभित्र मध्यमाञ्चल विकास क्षेत्र तथा १५ वर्षसम्ममा मुलुककै अग्रणी पाँच शैक्षिक संस्थामध्ये एक हुने लक्ष्य विद्यालयले निर्धारण गरेको छ । रासस