लोथरखोलाको बगरमा वृक्षरोपण अभियान सुरू

लोथर । चितवन र मकवानपुरको सिमाना मनहरीमा पर्ने लोथरपुलको पूर्वपट्टिको ड्याम र बगरमा वृक्षरोपण अभियान सुरू गरिएको छ ।
भू–क्षय र बाढी पहिरोको प्रकोप रोक्ने उद्देश्यका साथ चितवन राष्ट्रिय निकुञ्जअन्तर्गतको लोथर मध्यवर्ती उपभोक्ता समितिको आयोजनामा सो वृक्षरोपण कार्य गरिएको समितिका उपाध्यक्ष एवं वृक्षरोपण अभियानका संयोजक अशोक शाक्यले जानकारी दिए ।
मनहरी–१ सुनाचुरीमा रहेको श्री रणशेर दल गण र मनहरीका स्थानिवासीहरुको सहयोगमा सुरू गरिएको वृक्षरोपण अभियानको श्री रणशेर दल गणका प्रमुख सेनानी कृष्णध्वज थापाले बाँस प्रजातिको बिरुवा रोपेर अभियानको सुरूवात गरेका थिए ।
लामो समयदेखि भू–क्षयका कारण जोखिममा रहेको लोथर खोलाले गर्ने क्षतिको न्यूनीकरण गर्न २० हेक्टर क्षेत्रफलमा एक लाख बिरुवा रोपिने समितिका उपाध्यक्ष अशोक शाक्यले बताए ।
बकाइनो, बाँस, साल, सिसौं, खयरलगायतका विभिन्न प्रकारका पाँच सय बिरुवाहरु रोपिएको थियो । समितिका अध्यक्ष केदार खरेलको अध्यक्षतामा सम्पन्न वृक्षरोपण अभियानमा इलाका प्रहरी कार्यालय मनहरीका प्रहरी निरीक्षक नरसिंह राणा, संरक्षणका हातहरुका अध्यक्ष राजकुमार भट्टले बोलेका थिए ।