क्यान्सर अस्पतालमा उपकरणको अभाव

भरतपुर । देशकै मुख्य क्यान्सर अस्पताल बीपी कोइराला मेमोरियल क्यान्सर अस्पतालमा उचित उपकरणहरुको अभाव छ । केही अत्यावश्यक उपकरणहरु अस्पतालमा छदै छैनन् भने भएका उपकरणहरु पनि धेरै पुराना भएका छन् ।
अस्पतालमा उपचारका लागि आउनेमा स्तन क्यान्सरका बिरामीको संख्या उच्च छ । स्तन क्यान्सर भए नभएको पत्ता लाउन मेमोग्राफी परीक्षण हुने गर्छ । अस्पतालमा मेमोग्राफी मेशिन नै छैन । सुरूमा मेमोग्राफी मेशिन थियो । तर आठ वर्षअघि बिग्रेपछि अहिलेसम्म आएको छैन ।
‘सञ्चालक समितिका बैठकहरुमा पटकपटक कुरा उठाएको हो । तर चासो दिइएन’, अस्पतालका चिकित्सक तथा सञ्चालक समितिका पूर्व सदस्य डा।अनिलविक्रम कार्कीले भन्नुभयो । झण्डै एक करोड रुपैयाँ पर्ने सो मेशिन नहुँदा बिरामीहरु बाहिर गएर परीक्षण गराउन बाध्य छन् ।
अस्पतालका चिकितस्कहरु कम्तीमा पनि चारवटा मेमोग्राफी आवश्यक देख्छन् । तर एउटा किन्न पनि अस्पताल प्रशासनले आलटाल गर्दै आएको छ । अस्पतालमा आधारभूत उपकरणहरु नभएको योमात्रै होइन, अरु पनि धेरै नै छन् ।
अस्पतालको सीटी स्क्यान मेशिन पनि निकै पुरानो भएकोले नयाँ किन्न चिकित्सकहरुको माग रहेको छ । अस्पतालमा रहेको सीटी स्क्यान मेशिसन १५ वर्ष पुरानो हो । अहिले विश्वमा १२८ स्लाइसको सीटी स्क्यान मेशिन प्रयोगमा आइसकेको छ । तर भरतपुर अस्पतालको सिङ्गल स्लाइस हो ।
‘धेरै ठाउँमा ६४ स्लाइसको चलाउने गर्छन् । हाम्रोमा कम्तीमा पनि त्यत्तिको ल्याउनु पर्ने हो । तर पुरानैले काम चलाउने गरिएको छ’, डा।कार्कीले भन्नुभयो । अस्पतालमा भएको रेडियोथेरापी गर्ने मेशिन पनि निकै पुरानो भएकाले फेर्नुपर्ने अवस्थामा पुगेको छ । यसतर्फ खासै चासो दिइएको छैन ।
प्रधानमन्त्री सुशील कोइराला क्यान्सर भएका कारण अमेरिकामा रेडियोथेरापी लिइरहनुभएको छ । उहाँ लगातार रेडियो थेरापी गराइ रहनुभएको छ । सात दिनमा सकिएको प्रधानमन्त्री कोइरालाको रेडियोथेरापी चितवनमा गराएको भए कम्तीमा ३५ दिन लाग्ने चिकित्सकहरु बताउँछन् ।
त्यस्तै क्यान्सर भए नभएको बारेमा सुक्ष्म अनुसन्धान गर्न पेट स्क्यान मेशिन पनि अत्यावश्यक भएको चिकित्सकहरु बताउँछन् । नेपालमा त्यस्तो उपकरण नभएका कारण गत वर्ष राष्ट्रपति डा।रामवरण यादव जापान जानु परेको थियो ।
केही उपकरणहरु अत्यन्तै महँगा पनि छन्  । अस्पतालको स्रोतले त्यस्ता उपकरणहरु किन्न सक्ने अवस्था पनि छैन । सरकारी बजेट केही वर्षदेखि क्रमशः घट्दै आउन थालेको छ । त्यसैले आवश्यक उपकरणहरु खरिदमा समस्या हुने गरेको छ ।
‘अस्पतालले निश्चित बजेट यन्त्र उपकरण खरिदका लागि पनि पाउनु पर्छ । सञ्चालन खर्च र खरिद खर्चको व्यवस्था भए आवश्यक उपकरणहरु खरिद गर्न सहज हुने थियो’, अस्पतालका उपकार्यकारी निर्देशक डा।विजयराज न्यौपानेले भन्नुभयो ।