रत्ननगर । तेक्वान्दोका पाँच जना अन्तर्राष्ट्रिय प्रशिक्षकलाई बिहीबार रत्ननगर–५ चित्रसारीमा सम्मान गरिएको छ । तेक्वान्दो खेलमार्फत चितवनलाई अन्तर्राष्ट्रिय स्तरमा परिचित गराउन भूमिका खेलेको भन्दै उनीहरुलाई सम्मान गरिएको हो ।
चित्रसारी युवा खेलकुद समितिले पाँचौं विश्व पारा तेक्वान्दो रजत पदक विजेता यादव कुँवर, भर्खरै तेक्वान्दो प्रशिक्षक बन्न सफल किरण श्रेष्ठ, गोपाल श्रेष्ठ, प्रदिप श्रेष्ठ र हङकङका प्रशिक्षक गणेश गुरुङलाई सम्मान गरेको हो ।
किरण, गोपाल र प्रदिप विश्व तेक्वान्दो एकेडेमी (कुकिवान) कोरियाको आयोजनामा सम्पन्न ३५ औं अन्तर्राष्ट्रिय तेक्वान्दो मास्टर कोर्ष २०१४ मा भाग लिई अन्तर्राष्ट्रिय प्रशिक्षक बन्न सफल भएका थिए ।
कार्यक्रममा खेलाडीहरुलाई सम्मानपत्र र दोसल्ला ओेढाएर सम्मान गरिएको थियो । त्यसैगरी रत्ननगर–५ चित्रसारी निवासी किरण श्रेष्ठलाई स्थानीय चित्रसारी आमा समूहले समेत सोही कार्यक्रममा सम्मान गरेको थियो ।
इलाका प्रहरी कार्यालयका प्रमुख प्रहरी नावयउपरीक्षक टीकाबहादुर कार्की प्रमुख अतिथि रहनुभएको सो कार्यक्रममा चित्रसेन सामुदायिक वनका अध्यक्ष अशोक चौधरी, मावि चित्रसारीका प्रधानाध्यापक सूर्यप्रसाद लामिछाने, समितिका सदस्य निरज गुरुङ, चित्रसेन क्लबका अध्यक्ष राजेन्द्रकुमार थपलियालगायतले बोल्नुभएको थियो ।
चित्रसारी युवा खेलकुद समितिका सचिव निर्मल गिरीको अध्यक्षतामा भएको सो कार्यक्रमको संयोजन अनम गुरुङले गर्नुभएको थियो ।
Discussion about this post