वीरेन्द्रनगर गाविस पनि साक्षर

वीरेन्द्रनगर । वीरेन्द्रनगर गाविसलाई राजनैतिक दलहरुको प्रतिनिधिको उपस्थितिमा बुधबार पूर्ण साक्षर गाविस घोषणा गरिएको छ । ८८ वर्षीय नवसाक्षर मोती ठकुरीले ब्यानरमा लेखिएको शव्दहरु वाचन गरी साक्षर घोषणा गर्नुभएको हो । राष्ट्रिय साक्षरता अभियानअन्तर्गत सन् २०१५ सम्म चितवन जिल्लालाई साक्षर बनाउने लक्ष्यअनुसार वीरेन्द्रनगरलाई पूर्ण साक्षर गाविस घोषणा गरिएको हो ।
गाविस सचिव तीर्थराज घिमिरेको अध्यक्षतामा सम्पन्न  कार्यक्रममा जिल्ला शिक्षा अधिकारी दामोदर आचार्य प्रमुख अतिथि र सहायक जिल्ला शिक्षा अधिकारी भूमिलाल सुवेदी विशिष्ट अतिथि रहनुभएको थियो ।
घोषणा कार्यक्रममा नागरिक सचेतना केन्द्र वीरेन्द्रनगरका अध्यक्ष शिवराज अधिकारीले प्रतिवेदन पेश गर्नुभएको थियो । साक्षरता अभियानपछि १५ हजार ८४१ कूल जनसंख्या रहेको वीरेन्द्रनगर गाविसमा १५ हजार ७४१ पूर्ण साक्षर भएका छन् । यो साक्षरता कूल जनसंख्याको ९९.३६ प्रतिशत हो । एक हजार ९८० जनालाई साक्षर बनाएको प्रतिवेदनमा उल्लेख गरिएको थियो । घोषणा कार्यक्रममा बा“की रहेका निरक्षरलाई साक्षर बनाउने र साक्षरता कक्षालाई निरञ्तरता दिने प्रतिबद्धता पनि व्यक्त गरिएको
थियो ।
घोषणा कार्यक्रममा जिल्ला शिक्षा अधिकारी, सहायक जिल्ला शिक्षा अधिकारी, विभिन्न दलका प्रतिनिधिलगायत निवृत्त शिक्षक समाज क्षेत्र नं. १ का सचिव सिद्धराज लेखक, कालिका वन उपभोक्ता समितिका अध्यक्ष भीमबहादुर पुन,  नेकपा एमालेका छविलाल भुषाल, नेपाली कांग्रेसका मुरारीप्रसाद सिलवाल, एकीकृत नेकपा माओवादीका खिलप्रसाद घिमिरे, राष्ट्रिय प्रजातन्त्र पार्टीका गणपति कँडेल, मधेशी जनअधिकार फोरमका लनी महतोलगायतले मन्तव्य व्यक्त गर्नुभएको थियो ।
कार्यक्रममा ८० वर्षभन्दा माथिका नवसाक्षरहरुलाई दोसल्ला ओढाएर सम्मान गरिनुका साथै जोडी नवसाक्षर, ६० वर्षभन्दा माथिका साक्षर र कार्यक्रममा आर्थिक सहयोग गर्ने चन्दादाताहरुलाई सम्मान गरिएको थियो ।
चितवनको २५औं साक्षर गाविस घोषणा भएको उक्त कार्यक्रममा वीरेन्द्रनगर भजन मण्डली र थारु समाज वीरेन्द्रनगरले विभिन्न झा“की र बाजागाजासहित कार्यक्रम प्रस्तुत गरेको थियो ।