भरतपुर । दुई पदाधिकारीमा उम्मेद्वारी दिएका चितवनका एमाले नेताहरु पराजित भएका छन् । महासचिव पदमा उम्मेद्वारी दिएका चितवनका एमाले नेता सुरेन्द्र पाण्डे महासचिव पदमा पराजित हुनुभएको छ । त्यस्तै अर्का नेता केशवलाल श्रेष्ठ सचिव पदमा पराजित हुनुभएको छ ।
ओली पक्षका श्रेष्ठको जम्मा ९२२ मत आएको छ । चुनिनका लागि कम्तीमा पनि १ हजार २९ मत आवश्यक थियो ।
नेपाल प्यानलबाट उम्मेद्वारी दिएका पाण्डे ओली प्यानलबाट उम्मेद्वारी दिएका महासचिव ईश्वर पोखरेलभन्दा जम्मा ६ मतले मात्र पछि पर्नुभएको हो । पोखरेलको १ हजार ३६ र पाण्डेको १ हजार ३० मत आएको छ । महासचिवमा पराजित भएपनि केन्द्रीय सदस्यमा भने १ हजार ९४ मत ल्याएर पाण्डे विजयी हुनुभएको छ ।
त्यस्तै केन्द्रीय सदस्यमा भने काशिनाथ अधिकारी, कृष्ण खनाल र सीता पौडेल विजयी भएका छन् । देवी ज्ञवाली, विजय सुवेदी, दावादोर्जे लामा पराजित हुनुभएको छ ।
भूगोलतर्फ नारायणी अञ्चलबाट उठेका चितवनका विजय सुवेदी विरोध खतिवडासँग पराजित हुनुभएको छ । सुवेदी ओली र खतिवडा नेपाल पक्षका हुन् । त्यस्तै वैकल्पिक केन्द्रीय सदस्यमा उठेका कृष्ण खनालले चुनाव जित्नुभएको छ । महिलातर्फ ओली प्यानलबाट चितवनकी सीता पौडेल केन्द्रीय सदस्यमा विजयी हुनुभएको छ । जनजातिको वैकल्पिकमा ओली पक्षबाट दावादोर्जे लामा रहनुभएकोमा उहाँ पराजित हुनुभएको छ ।
ओली पक्षबाट काशीनाथ अधिकारी पूर्ण केन्द्रीय सदस्यमा विजयी हुनुभएको छ । अधिकारीले कुल १ हजार ९ मत ल्याउनुभएको छ । ओली प्यानलबाटै केन्द्रीय सदस्यमा उम्मेद्वारी दिएका देवीप्रसाद ज्ञवाली पराजित हुनुभएको छ ।
Discussion about this post