खैरहनीमा भएको दुर्घटनामा आठ दिनपछि प्रहरीलाई सफलता

भरतपुर । फागुन ९ गते बिहान ३ः३० बजे चितवन खैरहनी नपा–१ मा कालिका नगरपालिका–३ बस्ने ४० वर्षीय कुलबहादुर मोक्तानको दुर्घटनामा मृत्यु भयो । ट्राफिक प्रहरीका अनुसार हल्का मापसे गरेका मोक्तान सडकखण्डको बीच भागमा सुतेका थिए । उनले सडक बीच भागमै देखेका धेरै सवारीले छलेर गए । तर, ना ६ ख २९०९ नम्बरको ट्रकले उनलाई जोगाउन सकेन । यस ट्रकले ठक्कर दिँदा मोक्तानको घटनास्थलमै मृत्यु भएको थियो ।

दुर्घटना भई एक पुरूषको मृत्यु भएको सम्बन्धमा आठ दिनपछि चितवन प्रहरीले सफलता हात पारेको छ । दुर्घटना गराई ज्यान लिएको आरोप लागेको चालक र ट्रक प्रहरी नियन्त्रणमा छन् ।

सडकको बीच भागमा रहेका व्यक्तिको मृत्यु गाडीको ठक्करबाट भएको भन्नेमा प्रहरीले प्रारम्भिक निक्र्यौल निकाल्यो । तर, रातिको समयमा भएको दुर्घटनाका कारणले प्रहरीलाई ठक्कर दिने गाडी पत्ता लगाउन ठूलो समस्या भयो ।

घटना अन्य व्यक्तिले प्रत्यक्ष नदेख्नु, सिसी क्यामरा घटनास्थलनजिक नहुनुुु र ठक्कर दिनेले प्रहरीमा खबर गरेर इमानदारिता नदेखाउँदा अनुसन्धान सुरू गर्नै समस्या बनेको चितवन टाफिक प्रहरी प्रमुख दयाकृष्ण भट्टले बताए ।

कहाँबाट सुरू गर्ने भन्ने अन्योल भएपछि नजिक कतै सिसी क्यामरा छ कि भनेर खोजी भयो । साथै, ठक्कर दिने गाडी जान सक्ने हरेक क्षेत्रमा सिसी क्यामराबाट गाडी खोजी भयो । प्रनि भट्टका अनुसार सिसी क्यामरा फुटेज वीरगन्जबाट समेत मगाइयो, तर भेटिएन ।

पर्सा बजारमा एउटा कङ्क्रिट उद्योगनजिक सिसी क्यामरा रहेको थाहा भएपछि प्रहरी त्यसमा केन्द्रित भयो । नभन्दै ५० मिटर पर ट्रकजस्तो देखिने गाडीले ठक्कर दिएको पहिलो तथ्य फेला प¥यो । प्रहरीको अनुसन्धान ट्रकमा केन्द्रित भयो । अझै निहालेर हेर्दा १२ चक्के ट्रक भन्ने थाहा भयो । अनुसन्धान साँघुरियो । उनीहरुले नीलो वा हरियो रङको भनेर दुई रङको पनि यकिन गरे, अनि खोजीलाई तीव्रता दिए । ट्रक नै हो भन्ने यकिन भएपछि आफूहरुले यससँग सम्बन्धित यातायात समितिमा पनि पत्राचार गरेको ट्राफिक प्रहरी निरीक्षक भट्टको भनाइ छ ।

अनुसन्धानको क्रममा ठक्कर दिने र त्यसपछि आउँदै गरेको ट्रक एउटै कम्पनीका जस्ता देखिए । तेस्रो नम्बरमा भारतवेन्जको नाम भएको ट्रक देखियो । यो ट्रक पत्ता लागेपछि चालकले आफूभन्दाअगाडिको ट्रकले ठक्कर दिएको तर नम्बर यकिन गर्न नसकेको बताए ।

ठक्कर दिने ट्रकका चालक रत्ननगर टाँडीमा आएर रोकिए । त्यहाँ भएको क्यामराले ट्रकका सहचालक झरेर चालकपट्टिको अगाडिको टायर हेर्दै गरेको भेटियो । तर, अझै ट्रक यकिन भएन । ‘यसबीचमा हामीले २ सय वटा १२ चक्के ट्रक चेक ग¥यौँ’, ट्राफिक प्रनि भट्टले भने, ‘खोतल्दै खोतल्दै जाँदा ठक्कर दिने ट्रकनजिक पुगियो ।’

ठक्कर दिने ट्रकको स्वरुपबारे प्रहरीले अरुलाई जानकारी गराएको थियो । प्रहरीका लागि अर्को ट्रकका सहचालक सहयोगी बनिदिए । उनले प्रहरीले भनेअनुसारको ट्रक फलानो ठाउँमा छ भनी जानकारी दिए । ‘राजस्व काटेको ६ सयवटा ट्रकहरुका विवरण हेरियो, रातभरि दिनभरि ठाउँठाउँका सिसी क्यामरा फुटेज हेरियो, नाकानाकामा प्रहरी खटिए, अन्तमा सबै पक्षबाट ट्रक यकिन भएपछि नियन्त्रणमा लियौँ, त्यसपछि अल्लि ढुक्क भयौँ’, प्रनि भट्टले भने । अन्ततः ठक्कर दिने ट्रक ८ दिनपछि फागुन १७ गते फेला प¥यो ।

प्रहरीले यसलाई मह¤वपूर्ण सफलता मानेको छ । ठक्कर दिएको भनिएको ट्रकका चालक थिए, राप्ती नपा–१ का ३० वर्षीय गणेश तामाङ ।

उनले घटनाबारे आफूलाई केही थाहा नभएको बताए । केही भएको हो कि भनेर शङ्का लागेर हेर्दा टायरहरुमा पनि रगत, मासुको भाग वा अन्य कुनै प्रमाण नै नदेखेपछि आफूहरु मुग्लिनतर्फ लागेको चालकले प्रहरीमा बताएका छन् ।

प्रहरीका अनुसार माघ महिनामा मात्रै पूर्वी चितवन क्षेत्रमा भएको दुर्घटनामा कुल १५ मा ८ जनाले ज्यान गुमाएका छन् । चितवन ट्राफिकका अनुसार फागुन महिनाको हाल ५ दुर्घटना भएकोमा २ जनाको ज्यान गएको छ । साँघुरो सडकका कारण यस क्षेत्रमा बढी दुर्घटना हुने गरेको छ ।