कर्मचारीहरु अख्तियारको फन्दामा

भरतपुर । मध्यमाञ्चल सिंचाइ डिभिजन कार्यालय भरतपुरमा सोमबार अख्तियारले छापा मारेको छ । छापा मार्नेक्रममा अख्तियारले तीनजना इन्जिनियर र कार्यालयका लेखा अधिकृतलाई रकमसहित नियन्त्रणमा लिएको छ ।
सुराकीको आधारमा कार्यालय पुगेको टोलीले उनीहरुको साथबाट पाँच लाख २१ हजार रुपैयाँ बरामद गरेको छ । काठमाडौंको प्रगति निर्माण सेवा कम्पनीसँग टेण्डर स्वीकृतका लागि उनीहरुले घुस मागेका थिए ।
निर्माण व्यवसायीसँग घुस माग्दै आएका उनीहरुलाई व्यवसायीले घुस दिएका थिएनन् । घुस मागेर हैरानै बनाएपछि व्यवसायीले अख्तियारमा गुनासो गरेका थिए । इन्जिनियरहरु मधुप्रसाद अधिकारी, रामभद्र पण्डित, चक्रपाणी लामिछाने र कार्यालयका लेखा अधिकृत ऋषिभक्त तिमिल्सीना घुस लिदाँलिदै पक्राउ परेका हुन् ।
अख्तियारमा उजुरी दिएका निर्माण व्यवसायीले कर्मचारीलाई दिएको सबै रकमको फोटोकपी गरेर राखेका थिए । तिनै प्रमाणको आधारमा सोमबार अधिकारीसँग एक लाख ५० हजार र साथमा दुई लाख २८ हजारको बिटा, पण्डितसँग २३ हजारको बिटा, लामिछानेसँग एक लाखको बिटा बरामद गरेको हो । उनीहरुले लेखा अधिकृत तिमिल्सीनाको साथबाट भने जम्मा २० हजार वरामद गरेका छन् ।
नोटको फोटोकपीसँगै उजुरीकर्ताले घुस लेनदेनमा भएको अडियो कुराकानी प्रमाणको रुपमा अख्तियारलाई बुझाएका छन् ।