माडीमा सयौं घर डुबानमा

माडी । माडी क्षेत्रमा आएको भारी वर्षाले त्यस भेगका सयौं घर डुबानमा पारेको छ । बाढीले माडीका विभिन्न गाउँका ६५० भन्दा बढी घरहरु डुबानमा पारेको जिल्ला विपद् व्यवस्थापन समिति चितवनले जनाएको छ । आइतबार जिल्ला विकास समिति र विपद् व्यवस्थापन समितिले सो क्षेत्रको स्थलगत अनुगमन गरेको थियो । बाढीको प्रारम्भिक विवरण आए पनि पूर्ण विवरण आउन भने केही दिन लाग्ने जिविसका प्रकोप व्यवस्थापनका स्रोतव्यक्ति बलराम लुइँटेलले जानकारी दिनुभयो ।
अनुगमन टोलीले घरहरुमा डुबान कायमै रहेको जनाएको छ । शनिबार डुबानमा परेका क्षेत्रमा आइतबार बिहान आएको बाढी फेरि पसेर थप एकसय घर डुबाएको थियो ।
गर्दी गाविसमा ३०० घर, बघौडा गाविसमा ३०० तथा कल्याणपुर र बसन्तपुर क्षेत्रका ५० घर डुबेको जिविस प्रकोप व्यवस्थापन स्रोतव्यक्ति  लुइँटेलले बताउनुभयो ।
तीन गाविसका ३५० बिघा बढी धानखेतीमा बाढी पसेको छ । कल्याणपुरको पाँचघर र अन्य क्षेत्रका आठ गरी १३ घरमा घरभित्रै बाढी पसेर क्षति पु¥याएको स्थानीयले बताएका छन् । सिँचाइका लागि बनाइएको ७०० मिटर कुलोसमेत बगेको छ ।
त्यस्तै मगुई खोलाले गर्दी–५ को बैराठ, लौगाई, जीवनपुर र भैरवपुरमा लगाएको डेढसय बिघा धानखेतीमा बाढी पसेको स्थानीय मधुसूदन सुवेदीले बताउनुभयो । वनकट्टास्थित रिउ नदीमा हालेको पुलनजिकैकौ करिब १२ मिटर सडक बाढीले बगाएको छ । २६० मिटर कच्ची सडक पनि क्षतिग्रस्त बनेको छ ।
बाँदरमुढे खोलाले पनि केही क्षति पु¥याएको स्थानीयले बताएका छन् । गर्दीकै लौगाई, नयाँ पर्सामा मात्रै १६३ घर डुबानमा परेको छ । बनकट्टा र चन्द्रपुरीमा १७ घर डुबेको छ ।
कल्याणपुर–४ मा चन्द्रे खोलामा आएको बाढीले ७१ घरको ६४ बिघामा लगाएको धानखेतीमा क्षति पु¥याएको छ । त्यसमध्येको १३ बिघा बगरमै परिणत गरिदिएको छ । पाँच घरमा मझेरीभन्दा एक फिटजति माथि बालुवा थुप्रिएको छ भने ती घरका बासिन्दाको बिचल्ली भएको छ यसअघि माडीको बाँदरमुढे खोलामा आएको बाढीले माडीमा आइतबार ६० वर्षीया इशारा विकको मृत्युभएको छ ।