विनोदको ‘कसम तिमी बाहेक’ सार्वजनिक

चितवन १५ फागुन । भरतपुर ३ बाह्रघरेका विनोद तामाङको पहिलो गीत ‘कसम तिमी बाहेक’ बोलको आधुनिक गीतको म्युजिक भिडियो सार्वजनिक भएको छ। १० वर्ष दक्षिण कोरिया बसेर नेपाल फर्केका गायक तामाङले अहिलेका चर्चित गायिका मेलिना राईसँग उक्त गीत गाएका हुन्। तामङकै शब्द संगीत र तेजेन्द्र गुरूङको संगीत संयोजनमा तयार भएको गीतको भिडियोमा जुना सुन्दास र देव आरएनले अभिनय गरेका छन्। विनोदले ओएसआर डिजिटलको युट्यब च्यानलमार्फत उक्त गीत शनिबार सार्वजनिक गरेका हुन्।

सानैबाट गीत संगीतमा रहर भए पनि आर्थिक अभावका कारण गीत रेकर्ड गर्नबाट बञ्चित भएका तामाङले आगामी सांगितिक यात्रा भने कसम तिमी बाहेकबाट आउने प्रतिक्रियामा भर पर्ने बताएका छन्। शनिबार नारायणगढमा आयोजित पत्रकार भेटघाट कार्यक्रममा उनले भने, ‘नेपालमै हुँदा रहर भएर पनि रेकर्ड गर्न सकिएन, विदेश गएपछि बल्ल वातावरण बन्यो र यसवर्ष गीत रेकर्ड गरेँ।’ पहिलो गीतमा स्वर, शब्द र संगीत नै आफैँले गरेका छन्। यही गीत आफ्नो लागि परीक्षा हुने उनको भनाइ छ। ‘आशा छ, सबैले मन पराउनुहुनेछ,’ उनले भने।