दिपेन्द्र अधिकारी
भरतपुर । कृषकहरु आफ्नो व्यवसाय संचालनका लागि सहकारी र समूहबाट ऋण लिने गरेको पाइएको छ । २०६८ सालको कृषि गणनाको नतिजाअनुसार चितवन जिल्लाका किसानहरु ठूला बैंक र वित्तीय संस्थाभन्दा पनि गाउँघरमै उपलब्ध सहकारी र समूहबाट ऋण लिएको देखिन्छ ।
जिल्ला तथ्याङ्क कार्यालयले दिएको जानकारीअनुसार सबैभन्दा बढी महिला समूहबाट ऋण लिने गरेको पाइएको छ । ऋण लिएको स्रोतहरुमा सहकारी, कृषि विकास बैंक, कमर्सियल बैंक, कृषक समूह, महिला समूह, नातेदार रहेका छन् ।
चितवनमा विसं २०५८ मा कुल किसान परिवार संख्या ७१ हजार ४२९ रहेकोमा विसं २०६८ सम्म आइपुग्दा यो संख्या बढेर ८८ हजार २४२ पुगेको छ । कुल १६ हजार ५१२ किसानले ऋण लिएकोमा सबैभन्दा बढी महिला समूहबाट ऋण लिने किसानहरु रहेका छन् ।
ऋण लिने किसान विसं २०५८ मा जम्मा १४ हजार २६४ रहेका थिए । ऋणको मूल स्रोत महिला समूह रहेकोमा दोस्रो मूल स्रोतमा सहकारी र तेस्रोमा नातेदार रहेका छन् । यसरी हेर्दा किसानहरु नातेदार भन्दा पनि गाउँका समूह र सहकारीबाट ऋण लिन इच्छुक रहेको देखिन्छ ।
मूल स्रोत महिला समूहबाट चार हजार ८५ जनाले ऋण लिएको तथ्याङ्कले देखाएको छ । त्यसपछि सहकारीबाट तीन हजार ४४० र नातेदारबाट दुई हजार ६२३ जनाले ऋण लिई आफ्नो कृषि व्यवसाय संचालन गरेको देखिन्छ ।
कृषि पेसा प्रबद्र्धनमा खुलेको कृषि विकास बैंकबाट जम्मा दुई हजार ३२२ किसानले ऋण लिएको पाइन्छ । त्यस्तै किसानहरु नै मिलेर स्थापना गरेको कृषक समूहबाट ऋण लिने किसानहरु जम्मा दुई हजार २७९ रहेका छन् ।
कमर्सियल बैंकहरुबाट जम्मा एक हजार २०४ जना कृषकले ऋण सुविधा लिएको तथ्याङ्कले देखाएको छ । अन्य स्रोतबाट ऋण लिने किसानहरुको संख्या जम्मा ५५९ रहेको छ । बैंकहरुले कृषि क्षेत्रमा लगानी गर्ने गरे पनि खास किसानहरु बैंकिङ ऋण पहुँचबाट टाढा रहेको पाइएको छ ।
३१ प्रतिशत किसानले ऋण आवश्यक रहेको बताएका छन् । ६९ प्रतिशतले ऋण आवश्यक नरहेको बताएका छन् । विसं २०५८ सालमा यो प्रतिशत जम्मा २२ रहेको थियो । १२ हजार ४७१ कृषक परिवारले पशुपंक्षीपालनमा ऋण लिन चाहेको तथ्याङ्कमा उल्लेख छ ।
तीन हजार १०६ ले मल र बीउ, दुई हजार ४०८ कृषि औजार, दुई हजार २३६ कृषक परिवारले सिंचाइका लागि ऋण लिन चाहेको उल्लेख छ । त्यस्तै माछापालनका लागि एक हजार ११८ कृषक परिवारले ऋण लिन चाहेको तथ्याङ्कमा उल्लेख छ । कृषि ऋण इच्छुक किसानहरु विसं २०५८ सालमा १६ हजार २३२ रहेकोमा २०६८ मा यो संख्या बढेर २७ हजार ३२० पुगेको छ ।
Discussion about this post