कठार गाविस पनि साक्षर

कठार । पूर्वी चितवनको कठार गाविसलाई पनि साक्षर गाविस घोषणा गरिएको छ । योसँगै जिल्लामा साक्षर घोषणा हुने गाविसको सख्या २० पुगेको छ । यसअघि पछिल्लो पटक पिप्ले गाविस साक्षर घोषणा भएको थियो ।
कठार गाविसको जीवनपुर निमाविमा आयोजित एक कार्यक्रमबीच गाविसमा रहेका दुई हजार ३०५ जना निरक्षरमध्ये दुई हजार २८४ जनालाई साक्षर बनाएपछि गाविसलाई साक्षर घोषणा गरिएको हो । अब गाविसमा २१ जना मात्रै निरक्षर रहेको साक्षर कक्षा सञ्चालनको जिम्मा पाएको कठार सामुदायिक अध्ययन केन्द्रका कोषाध्यक्ष एवम् कार्यक्रम संयोजक बलराम बर्देवाले जानकारी दिनुभयो ।
कठार गाविसमा ११ हजार ३१९ जनसंख्या छ । ९० वटा कक्षा सञ्चालन गरिएको थियो । कार्यक्रममा अध्ययन केन्द्रका अध्यक्ष बर्देवाले साक्षरता कक्षाको प्रगति प्रतिवेदन प्रस्तुत गर्नुभएको थियो ।
कार्यक्रमका प्रमुख अतिथि जिल्ला शिक्षा अधिकारी दामोदर आचार्यले साक्षर गाविस घोषणा गर्न सहयोग गर्ने सबैलाई धन्यवाद दिँदै बाँकी रहेका निरक्षरको पहिचान गरी उनीहरुलाई पनि साक्षर बनाउन आगामी दिनमा कक्षा सञ्चालन गर्दै लैजाने बताउनुभयो । त्यसका लागि बजेट नआउने हुँदा स्थानीय सरोकारवालाहरुले नै सहयोग गर्नुपर्ने उहाँले बताउनुभयो ।
अध्ययन केन्द्रका अध्यक्ष यमबहादुर ढुङ्गानाको अध्यक्षतमा भएको घोषणा कार्यक्रममा विभिन्न राजनीतिक दलका पार्टी प्रमुख एवम् प्रतिनिधि, विभिन्न संघसंस्थाका प्रतिनिधिलगायतले शुभकामना मन्तव्य राखेका थिए ।