भरतपुर । शिक्षा तथा मानव स्रोत विकास केन्द्रले चितवनका सामुदायिक विद्यालयहरुमा दिइने दिवा खाजाको तालिका सूची (मेनु) पठाएको छ । चितवनका स्थानीय तहका शिक्षा शाखाहरु तथा शिक्षाका सम्बन्धित कार्यालयहरुमा दिवा खाजाको मेनु विकास केन्द्रले पठाएको हो ।
केन्द्रले प्रारम्भिक बालविकासदेखि कक्षा ५ सम्म पढ्ने ४ वर्षदेखि १२ वर्षसम्मका बालबालिकालाई विद्यालयमा खुवाइने खाजा अनावश्यक या जंकफुड नहोस् भन्ने हेतुले मेनु पठाएको हो ।
चितवनका सामुदायिक विद्यालयमा खुवाइने खाजामा गहुँको हलुवादेखि भुटेको भातसम्म रहेको शिक्षा तथा मानव स्रोत विकास केन्द्रले जनाएको छ । प्रत्येक बार फरकफरक खाजा छ । दिवा खाजा मध्यान्तरको समयमा खुवाउन भनिएको छ ।
विकास केन्द्रले चितवनलाई पश्चिम तराई सेट १ अन्तर्गत राखेर दिवा खाजाको मेनु पठाएको छ । केन्द्रका अनुसार चितवनका सामुदायिक विद्यालयले ६ वटा बारमा फरकफरक खाजा खुवाउनुपर्छ । केन्द्रले पठाएको मेनुमा एक बार भुटेको भात खुवाए अर्को बार गहँुको हलुवा, अर्को बार मिक्स गेडागुडी (क्वाँटी) खुवाउनुपर्छ ।
त्यस्तै, एक बार मासुचिउरा, अर्को बार जाउलो खुवाउनुपर्छ । अर्को बार मकै भटमास र तरकारी खुवाउन केन्द्रले निर्देशन गरेको छ । यसबाहेक वैकल्पिक खाजाको तरकारीमा काउली, फर्सीको डुकु, रायो, पालुङ्गो, लट्टे, बेथेको साग, तरूल, पिँडालु, सलादमा मुला, गाजर राखिएको छ । फलफूलमा आँप, लिची, मेवा, केरा राखिएको छ ।
‘केन्द्रले दिवा खाजाको मेनु पठाएको छ, त्यही मेनुको पालना गर्न विद्यालयहरुलाई भन्न थालेका छौँ । केन्द्रले पठाएको मेनु विद्यालयलाई पनि पठाइन्छ’ भरतपुर महानगर शैक्षिक प्रशासन महाशाखाका प्रमुख महेन्द्र पौडेलले भने ।
चितवनको दिवा खाजामा खाजा हेरी प्रतिविद्यार्थी प्रत्येक दिन १२ रूपैयाँ ५५ पैसादेखि १६ रूपैयाँ ३८ पैसासम्म लाग्ने उल्लेख छ । यद्यपी एक दिनमा एक विद्यार्थीबराबर १५ रूपैयाँको खाजाको बजेट संघीय सरकारबाट स्कुलमा आउँछ । खाजा बनाउने कर्मचारी स्कुल आफैँले व्यवस्थापन गर्नुपर्छ ।
‘केन्द्रले पठाएको दिवा खाजाको मेनुमा बालबालिकालाई चाहिने पोषण त¤व पुग्दो छ, यहीअनुसार नै खाजाको व्यवस्था विद्यालयले गर्नुपर्छ’ भरतपुर महानगर शैक्षिक प्रशासन महाशाखाका अधिकृत ऋषिराम शर्माले भने, ‘मेनुमा जुन खाजा छ, ती खाजाको बालबालिकाले पाउने पोषण त¤व पनि उल्लेख गरिएको छ ।’
संघीय सरकारको सशर्त अनुदानबाट प्राप्त दिवा खाजाका लागि भनेर आएको बजेट पालिकाहरुले विद्यालयहरुको खातामा हाल्ने गरेका छन् । कक्षामा उपस्थित भएको दिनमात्रै विद्यार्थीले खाजा पाउँछन् ।
भरतपुर महानगरमा १२३ सामुदायिक विद्यालयमा बालविकास कक्षादेखि पाँच कक्षासम्म अध्ययनरत बाबुनानी १७ हजार १५९ जना छन् । एक विद्यार्थीलाई १५ रूपैयाँको खाजा खुवाउँदा एक महिनामा औसतमा ६० लाख खर्च हुने भरतपुर महानगर शैक्षिक प्रशासन शाखाले जनाएको छ ।
खाजा पाउने आशले पनि विद्यार्थी कक्षामा नियमित भइरहेका छन् । शनिबारको बिदा र अन्य किसिमका बिदा काट्दा सरदरमा एक विद्यार्थीले औषतमा एक महिनामा २२ दिनसम्म दिवा खाजा खान्छन् ।
Discussion about this post