देवघाटको एक घरमा आगलागी

भरतपुर । तनहुँको देवघाट गाउँपालिका वडा नं १ बसेनीटारस्थित एक घरमा आगलागी भएको छ । स्थानीय मंगलसिंह भुजेलको घरमा आगलागी हुँदा घर जलेर नष्ट भएको छ । आगलागीबाट मानवीय क्षति भने भएको छैन ।

ढुंगाको पर्खाल र खरको छानो भएको करिब दुई लाख बराबरको घर जलेर पुर्ण रुपमा नष्ट भएको इलाका प्रहरी कार्यालय देवघाटका इन्चार्ज उज्जवलराज चिलवालले जानकारी दिए । करिब एक लाख ३५ हजार रुपैयाँ बराबरको खाद्यान्न, भाँडाकुडा र नगद पैसा जलेर नष्ट भएको उनले बताए । घरको छानाबाट आगलागी सुरु भएको स्थानीय प्रत्यक्षदर्शीहरुले बताएका छन् ।

बालबालिकाहरुले लाइटर खेलाउँदा झुक्किएर आगलागी भएको हुन सक्ने प्रारम्भिक अनुसन्धानबाट खुलेको प्रहरीले जनाएको छ । दिउँसो करिब साढे ३ बजे लागेको आगो निभाउन स्थानीयहरुले एक घण्टासम्म प्रयास गर्दापनि सफल नभएको स्थानीय आशिक रानाले बताए ।

देवघाट गाउँपालिकाका अध्यक्ष दुर्ग बहादुर थापा, रोटरी क्लब अफ नारायणगढका प्रतिनिधि र स्थानीयहरुले आगो निभाउन प्रयास गरेका थिए । आर्थिक अवस्था कमजोर रहेका भुजेलको एक श्रीमती, दुई छोरी, एक छोरा र एक आमा रहेकी छन् ।