नवलपरासी । स्वास्थ्य तथा जनसंख्यामन्त्री हृदयेश त्रिपाठीले सबै नेपाली नागरिकलाई निःशुल्क कोरोनाविरूद्धको खोप उपलब्ध गराउन सरकार लागिपरेको बताएका छन् ।
पश्चिम नवलपरासीको बर्दघाट नगरपालिका–९, भुताहामा पञ्चनगर स्वास्थ्यचौकीको आइतबार शिलान्यास गर्दै स्वास्थ्यमन्त्री त्रिपाठीले आफ्नो पहिलो प्राथमिकता सबै नेपाली नागरिकलाई निःशुल्क कोभिड–१९ विरूद्धको खोप उपलब्ध गराउनु रहेको बताए । उनले सबै नागरिकलाई आफ्नो पालोमा खोप लगाउन आग्रह पनि गरे । उनले सबै पालिकाहरुमा आधारभूत अस्पताल निर्माणमा पूर्णता दिन सरकार लागिपरेको बताए ।
नेकपा एमालेको सूर्य चुनाव चिन्ह लिएर निर्वाचन जितेको भए पनि स्वतन्त्र राजनीतिक समूहको नाममा स्वतन्त्र बसेका त्रिपाठीले पछिल्लो राजनीतिक घटनाक्रम रोचक मोडमा पुगेको भन्दै दलहरुलाई आन्दोलन नगरी सर्वोच्च अदालतको आदेश पर्खन आग्रहसमेत गरे ।
कार्यक्रममा सभासद् विक्रम खनाल, बर्दघाट नगरपालिकाकी नगर उपप्रमुख मायादेवी पौडेल, बर्दघाट नगरपालिकाका प्रमुख प्रशासकीय अधिकृत मेघनाथ पाध्याय, नेकपा बर्दघाट नगर इन्चार्ज रूद्रप्रकाश उपाध्याय, नेपाली कांग्रेस बर्दघाट नगर सभापति शम्भुलाल श्रेष्ठ, मदन–आश्रित प्रतिष्ठानका अध्यक्ष यज्ञप्रसाद खनाललगायतले मन्तव्य राखेका थिए ।
राष्ट्रिय पुनर्निर्माण प्राधिकरण जिल्ला आयोजना कार्यान्वयन इकाइ भरतपुरको सहयोगमा निर्माण सुरू गरिएको स्वास्थ्यचौकी १५ महिनाभित्र निर्माण गर्ने गरी ३ करोड ३० लाख ५५ हजारको लागतमा निर्माण सुरू गरिएको हो ।
बर्दघाट वार्ड नंं–९ का वार्ड अध्यक्ष एवं पञ्चनगर स्वास्थ्यचौकी सञ्चालन तथा व्यवस्थापन समितिका अध्यक्ष चन्द्रकान्त चापागाईंको अध्यक्षतामा शिलान्यास कार्यक्रम भएको थियो ।
Discussion about this post