भरतपुर । ७४ वर्षीया वृद्धा बाबुहजुर थापाको घरैनजिक शोभा विक भट्टी पसल सञ्चालन गर्थिन् । वृद्धाका लागि उनी सहयोगी थिइन् ।
किनकि, घरमा एक्लै बस्ने ती ७४ वर्षीया महिलालाई कुनै खाद्य वस्तु वा ग्यासहरु घरमा लैदिन परे शोभा अघि सर्थिन् । आफूलाई सहयोगी भावनाको देखाएर वृद्धाको मन पगाल्दै गएकी उनी असोज ५ गते वृद्धाले थाहा नपाउने गरी घरमा छिरिन् । दिनभरिजसो घरको तल्लो तलामा लुकेर बसिन् ।
साँझपख ती महिला माथिल्लो तलामा गइन् । वृद्धा शौचालय गएकी थिइन् । शौचालयबाट निस्कनेबित्तिकै वृद्धाको अनुहार सलले छोपिदिइन् । तत्कालै उनको टाउको भित्तामा बजारिन् ।
दुवैजनाबीच घम्साघम्सी पनि चल्यो, वृद्धाले आफ्नो मुख छोपिदिने ती शोभालाई चिनिन् । वृद्धाको सुन, गरगहनामात्रै लुटपाट गर्ने उद्देश्यले पुगेकी शोभा वृद्धाले चिनेपछि उनको हत्या गर्न लागिन् । तामाको अम्खरा छेउमै रहेकोमा उनले त्यसैले पटकपटक हानेर वृद्धाको हत्या गरिन् । त्यसपछि सोही वृद्धाको मोबाइल लिएर उनी त्यहाँबाट फरार भइन् ।
असोज ५ गते नै मृत्यु भए पनि परिवारले भने ७ गतेमात्रै थाहा पायो । फोन सम्पर्क हुने, हिँडडुल गर्ने आमा सम्पर्कविहीन भएपछि कान्छो छोरा घर पुगेर हेर्दा च्यानल गेट बाहिरबाट ताला लगाएको अवस्थामा भेटे । ताला फोरेर घरभित्र छिरे । सीधै माथि आमाको कोठामा जाँदा त्यहाँ पनि बाहिरबाट ताला लागेको थियो । त्यो पनि फोरे । कोठा फोरेर हेर्दा भित्र बूढीआमालाई मृत अवस्थामा देखेपछि हल्लाखल्ला भयो ।
प्रारम्भिक बयानका क्रममा शोभाले सबै प्रसङ्ग खुलाउँदै लगेकी छन् । वृद्धा थापाको हत्या घटनामा संलग्नता पुष्टि भएको भन्दै चितवन प्रहरीले मकवानपुर जिल्ला थाहा नगरपालिका–८ घर भई भरतपुर–९, शरदपुरमा डेरा गरी बस्ने ३५ वर्षकी शोभा विकलाई पक्राउ गरेको चितवन प्रहरी प्रमुख एसपी ओम अधिकारीले बताए । हत्या घटना गत असोज ७ गतेको हो भने आरोपित महिला फागुन २ गते पक्राउ परेकी हुन् । आरोपितले अपराध स्वीकार गरेको प्रहरीको भनाइ छ । प्रहरीले जन्मकैदको माग गरी ज्यानसम्बन्धी कसुरमा मुद्दा चलाएको छ ।
मोबाइल कनेक्सन
घटना भएपछि पीडित परिवारले असोज ८ गते चितवन प्रहरीमा बेनामे उजुरी दिए । १३ दिनको काजक्रिया सकिएपछि असोज १९ गते पुनः पुरक जाहेरी जिल्लामा दर्ता गराए । उजुरी दर्ता भयो, तर अनुसन्धान अघि बढेन । मृतककी छोरा नातिविक्रम थापाले आमाको हत्या भएको तर प्रहरीले चासो नदिएपछि पुनः माघ २० गते सिआइबीमा निवेदन दिए । त्यसपछि अनुसन्धानले गति लियो र अपराधीसम्म प्रहरी पुग्न सफल भयो ।
वृद्धा आमाले प्रयोगमा ल्याएको मोबाइल प्रहरीले ट्रयाकिङ गर्दा हेटौँडामा प्रयोग भएको पाइयो । एक पुरूषसँग सोधपुछ गर्दा मोबाइल छोराले दिएको बताए । युनाइटेड कलेज काठमाडौँमा पढ्ने छोरासँग सोध्दा उनले हेटौँडा वीरगन्ज रूटमा चल्ने ड्राइभरसँग किनेको जवाफ दिए । उक्त मोबाइल बेच्ने ड्राइभर पनि पत्ता लाग्यो । उनले मोबाइल आफ्नो भाइले दिएको जवाफ दिए । उनको भाइ तेस्रोलिङ्गी भएको र उनले प्रहरीको अत्यधिक केरकारपछि शोभा भन्ने मान्छेसँग किनेको जवाफ दिए ।
शोभा खोज्दै प्रहरी पोखरा पुग्यो । वृद्धाको हत्यापछि उनी पोखरामा रक्सी पसल चलाएर बसेकी रहिछन् । शोभासँग लामो केरकारपछि उनी पहिले चितवन र शरदपुरआसपास बस्ने गरेको पत्ता लाग्यो । अनि, वृद्धाको छोराले पनि शोभा वेलाबेलामा आमासँग घर आउने गरेको बताए । प्रहरीको अनुसन्धान साँघुरिँदै गयो र अन्त्यमा थाहा भयो घटना शोभा विकले नै गराएकी रैछन् ।
Discussion about this post