भरतपुर । एकै घरका दुई दाजुभाइको हत्यामा संलग्न दोषीलाई सरकारले आममाफी दिएको भन्दै तत्कालीन तरूण दल चितवनका अध्यक्ष शिव पौडेलको परिवारले आपत्ति जनाएको छ । चितवनको भरतपुर महानगरपालिका वडा नं–१० निवासी पौडेल र उनका भाइ गोविन्द पौडेल (गोपी)को हत्या आरोपमा सर्वस्वसहित जन्मकैद सजाय भोगिरहेका तीन जनालाई फागुन ७ गते राष्ट्रपतिले आममाफी दिएपछि पीडित परिवारले आइतबार पत्रकार सम्मेलन गरेर आफूहरुमाथि अन्याय भएको भन्दै अदालत जाने बताएका हुन् ।
एकै घरका दुई जनाको हत्या गरेर दोषी ठहर भई सर्वस्वसहित जन्मकैद भएका व्यक्तिलाई आममाफी दिएर पीडित परिवारमाथि नै अन्याय गरेको शिव पौडेलकी श्रीमती बिनु रायमाझी पौडेलले बताइन् । समाजमा पहुँच भएकै व्यक्तिमाथि अन्याय गरेको सरकारबाट सर्वसाधारण जनताले पीडामा पर्दा न्याय पाइन्छ भनेर विश्वास गर्न नसकिने उनको भनाइ छ ।
‘मेरो श्रीमान् र देवरको हत्या गर्नेलाई जेल हालियो भनेर न्यायको महसुस गरिरहँदा आज राष्ट्रपतिमार्फत आममाफी दिएको कुराले हामीमाथि फेरि अन्याय भएको छ’, उनले भनिन् ।
सरकारकै संरक्षणमा कारागारभित्र रहेकै अवस्थामा आक्रमण गरी नियोजित तरिकाले हत्या गरेर दोषी ठहरिएकाहरुलाई छाडेर समाजमा फेरि अर्को घटना निम्त्याउन खोजिएको उनको आरोप छ । राष्ट्रपति विद्यादेवी भण्डारीले दासढुङ्गा घटनालाई नियोजित तरिकाले हत्या गरिएको हो भनिरहँदा आफैँ पदमा पुगिसक्दासमेत हत्यारा खोज्न नसकेको उनले बताइन् । ‘आफ्नै श्रीमानको हत्यारा खोज्न सकिएन भन्दैमा अरुका श्रीमान्को हत्यारालाई किन छाड्ने ? राष्ट्रपति भण्डारीप्रति लक्षित गर्दै उनले प्रश्न गरिन् ।
राष्ट्रपति भण्डारीले विभिन्न अभियोगमा जेल जीवन बिताइरहेकाहरुलाई अनुशासन र आचरणको मूल्याङ्कन गरी राष्ट्रिय प्रजातन्त्र दिवसको अवसरमा भरतपुर कारागारमा सर्वस्वसहित जन्मकैद भुक्तान गरिरहेका सुनिल केसी, फणीन्द्र श्रेष्ठ र दिलबहादुर मोक्तानलाई आममाफी दिएकी थिइन् । त्यतिबेला उक्त घटनामा संलग्न भएको आरोपमा ८ जनालाई जन्मकैदको फैसला भएको थियो । तीमध्ये तीन जनाले आममाफी पाएका हुन् ।
राजनीतिक प्रतिशोधका आधारमा आफ्ना कार्यकर्ता निकालेको गोविन्दकी श्रीमती रीता पौडेलको आरोप छ । आचरणलाई बहाना बनाएर दुई जना दाजुभाइकै हत्या गर्नेलाई आममाफी दिनु कुनै पनि हालतमा स्वीकार्य नभएको उनले बताइन् ।
‘हामीमाथि अन्याय भएको छ, हामीले हिजोसम्म न्यायको महसुस गरेका थियौँ भने आज आएर अन्याय भएको महसुस गरेका छौँ’, उनले भनिन्, ‘त्यसै होइन रहेछ न्याय मरेको देश भनेर भनेको, आज बल्ल थाहा भयो ।’
पौडेल परिवार नेपाली कांग्रेस र हत्या गर्ने समूह तत्कालीन नेकपा एमालेका कार्यकर्ता हुन् । दुई समूहबीच भएको विवादका क्रममा २०६६ जेठ ३ गते गोविन्द पौडेललाई कुटपिट गरी गम्भीर घाइते बनाइएको थियो । दुई दिनपछि उनको मृत्यु भयो । त्यही समूहले दाइ शिवलाई पनि २०६८ साल मंसिर २० गते राति भरतपुर कारागारभित्रै आक्रमण गरेर गम्भीर घाइते बनायो । उपचारको क्रममा सोही वर्ष पुस २ गते काठमाडौँमा शिव पौडेलको पनि मृत्यु भयो ।
व्यवसाय र राजनीतिक विषयसँग जोडिएको घटना भएकोले यो घटना त्यतिबेला नै सर्वत्र चासोको विषय बनेको थियो । नेपाल तरूण दल चितवनले पनि यस विषयलाई गम्भीररुपमा लिएको जनाएको छ । तरूण दल चितवनका अध्यक्ष राजन ताम्राकारले संगठनको पूर्वअध्यक्षको हत्यारालाई आममाफी दिएको विरूद्धमा आन्दोलन गर्ने चेतावनी दिए । ‘पार्टी र संगठनभित्र छलफल भइरहेको छ’, उनले भने, ‘केही दिनमै हामी आन्दोलन गर्छौं ।’
Discussion about this post