चितवनमा धान दिवस मनाइयो

होमनाथ सापकोटा
रत्ननगर । चितवनका किसानले आइतबार ११ औं राष्ट्रिय धान दिवस मनाएका छन् । सिंचाई पुगेका क्षेत्रहरुका किसानहरु एक ठाउँमा जम्मा भएर एकआपसमा हिलो दलादल र दही चिउरा खाएर धान दिवस मनाएका हुन् ।
जिल्ला कृषि विकास कार्यालय चितवनलगायत विभिन्न समूहहरुले विभिन्न कार्यक्रम गरी धान दिवस मनाएका छन् । गत वर्ष पश्चिम चितवनमा धान दिवस मनाएको जिल्ला कृषि विकास कार्यालयले यस वर्ष भने पूर्वी चितवनको खैरहनी नगरपालिका–६ तुलसीपुरमा एक कार्यक्रम गरी दिवस मनाएको छ ।
दिवसका अवसरमा कार्यालयले हिलेदौड, विभिन्न साँस्कृतिक कार्यक्रम गरी हिलो छ्यापाछ्याप गर्दै दही चिउरा खाएर दिवस मनाएको कार्यालयका प्रमुख राजाराम अधिकारीले जानकारी दिनुभयो । समयमै पानी पर्न नसकेका कारण राष्ट्रिय धान दिवसको औपचारिक कार्यक्रम यस वर्ष पूर्वी चितवनमा मात्र सीमित भएको छ । पर्याप्त सिंचाई नभएका कारण चितवनमा असार १५ सकिँदा जम्मा १५ प्रतिशतमात्र रोपाइँ भएको छ ।
कृषकहरुलाई खाद्यान्न बालीतर्फ प्रोत्साहित गर्ने उद्देश्यले कार्यक्रम गरिएको अधिकारीले बताउनुभयो । यस वर्षको दिवसमा ‘धान खेतीमा आधुनिकीकरण, खाद्यान्न आयातमा न्यूनीकरण’ भन्ने नारा तय गरिएको थियो ।
नेपाल कुखुरा व्यवसायी मंचका अध्यक्ष चन्द्रमान श्रेष्ठको प्रमुख आतिथ्यतामा भएको कार्यक्रममा जिल्ला पशुसेवा कार्यालयका प्रमुख रामकुमार कार्की, नेपाल अण्डा उत्पादक संघका केन्द्रीय अध्यक्ष शिवराम केसीलगायतले धान दिवसको मह¤वको बारेमा मन्तव्य राखेका थिए । कार्यक्रम जिल्ला कृषि विकास कार्यालयका प्रमुख राजाराम अधिकारीको अध्यक्षतामा सम्पन्न भएको थियो  ।
त्यसैगरी बछौलीमा पनि एक औपचारिक कार्यक्रमको आयोजना गरी राष्ट्रिय घान दिवस मनाइएको छ । स्थानीय बरपीपल कृषक महिला समूहले आयोजना गरेको सो कार्यक्रममा बोल्ने वक्ताहरुले सरकारले कृषि औजार तथा सिंचाईमा अनुदान नदिएका कारण धान उत्पादनमा समस्या परेको गुनासो गरेका थिए ।
बछौली गाविसका सचिव तेजेन्द्रनाथ लामिछानेको प्रमुख आतिथ्य एवम् समूहकी अध्यक्ष भूमिश्वरा पौडेलको अध्यक्षतामा कार्यक्रम भएको थियो ।
यसैबीच पिठुवा–५ पारिजातचोकमा रहेको हरियाली समूहले पनि धान दिवस मनाएको छ । समूहले डिप बोरिङ निर्माणका क्रममा जग्गादान गर्ने जग्गादातालाई सम्मान गर्नुका साथै असारे गीत गाउँदै हिलो खेलेर धान दिवस मनाएको समूहका अध्यक्ष टंक खनालले जानकारी दिनुभयो ।
सो क्षेत्रमा ८ लाखको लागतमा डिप बोरिङमार्फत सिंचाई हुँदै आएको छ । चितवनमा कुल खेतीयोग्य जमिनमध्ये २९ हजार ५ सय हेक्टर क्षेत्रफलमा वर्षे धान लगाइन्छ । जिल्लामा वार्षिक एक लाख १७ हजार ७५५ मेट्रिकटन धान उत्पादन हुने गरेको जिल्ला कृषि विकास कार्यालयका प्रमुख राजाराम अधिकारीले जानकारी दिनुभयो ।
वागीश्वरीमा पनि १५ असार
यसैबीच वागिश्वरी आध्यात्मिक परिषद् योगी नरहरिनाथ आश्रमको आयोजना तथा जलदेवी सामुदायिक वनको संयोजनमा आश्रम परिसर वागिश्वरीमा विभिन्न कार्यक्रम गरी आइतबार १५ असार मनाइएको छ ।
देवघाट क्षेत्र विकास समितिका अध्यक्ष शैलेन्द्र पियाको प्रमुख आतिथ्यतामा कार्यक्रम सम्पन्न भएको थियो । सो अवसरमा उहाँले परिषद्को ब्रोसर विमोचनसमेत गर्नुभयो ।
कार्यक्रममा गौ समिति संयोजक टंकनाथ पौडेलले असार १५ को मह¤वबारे प्रकाश पार्नुभएको थियो । कार्यक्रममा जिल्ला पशुसेवा कार्यालय चितवनका प्रमुख रामकुमार कार्की, समाजसेवी घना खतिवडालगायतकाले बोल्नुभएको थियो ।
आध्यात्मिक परिषद्का अध्यक्ष शान्तप्रसाद पोख्रेलको अध्यक्षतामा सम्पन्न सो कार्यक्रममा उपाध्यक्ष कृष्णहरि देवकोटाले स्वागत मन्तव्य व्यक्त गर्नुभएको थियो ।