आज असार १५

रत्ननगर । आज असार १५ अर्थात् ११ औं राष्ट्रिय धान दिवस चितवनका किसानले हर्षोल्लासका साथ मनाउँदै छन् । जिल्लाका विभिन्न ठाउँका किसानहरुले औपचारिक कार्यक्रम गरेर राष्ट्रिय धान दिवस मनाउन लागेका हुन् ।
‘धानखेतीमा आधुनिकीकरण, खाद्यान्न आयातमा न्यूनीकरण’ भन्ने नाराका साथ मनाइने राष्ट्रिय धान दिवसमा किसानलाई उत्पादन बढाउन र धानखेती गर्न प्रेरित गरिने जिल्ला कृषि विकास कार्यालयका प्रमुख राजाराम अधिकारीले बताउनुभयो ।
आज आइतबार किसानहरुले दही चिउरा खाएर तथा एकआपसमा हिलो दलेर असार १५ मनाउँदैछन । असार १५ मनाउन पूर्वी चितवनका छुट्टाछुट्टै ठाउँमा कार्यक्रम आयोजना गरिएको छ ।
जिल्ला कृषि विकास कार्यालय भरतपुरले खैरहनी नगरपालिका–६ तुलसीपुरमा र बछौलीमा महिला समूहले औपचारिक कार्यक्रमको आयोजना गरेका छन् ।