दाहाल र धामीबीच फाइनलमा प्रतिस्पर्धा हुँदै

भरतपुर । चितवनमा जारी प्रथम प्रधानमन्त्री कप राष्ट्रिय खुल्ला ब्याडमिन्टन प्रतियोगिताको फाइनलमा एपिएफ क्लबका प्रिन्स दाहाल र एपिएफ क्लबकै दिपेश धामीबीच प्रतिस्पर्धा हुने भएको छ ।
विश्व वरियतामा तेस्रो नम्बरका खेलाडी दाहालले मेन्स सिङ्गलतर्फ भोजपुरका विकास श्रेष्ठलाई हराउँदै फाइनलमा पुगेका हुन् । दाहालले श्रेष्ठलाई २१–१२ र २१–१४ को सेटमा पराजित गरेका थिए । एपिएफ क्लबकै दिपेश धामीले त्रिभुवन आर्मीका नवीन श्रेष्ठलाई पराजित गरेका हुन् ।
शनिबार भएको सेमिफाइनलमा धामीले श्रेष्ठलाई २१–१९ र २१–१९ को सेटमा हराउँदै फाइनलमा प्रवेश गरेका हुन् । त्यस्तै, वुमन्स सिङ्गलतर्फ एपीएफकी जेसिका गुरूङले त्रिभुवन आर्मीकी आयुष्मा राईलाई २१–१७ र २१–१५ को सेटमा हराउँदै फाइनल प्रवेश गरेकी छिन् । वुमन्स सिङ्गलतर्फको अर्को खेलमा त्रिभुवन आर्मीकी रसिला महर्जनले त्रिभुवन आर्मीकै अमिता गिरीलाई २१–१३ र २१–१७ को सेटमा हराउँदै फाइनल प्रवेश गरेकी छन् ।
फाइनलमा त्रिभुवन आर्मीकी रसिला महर्जनले एपीएफकी जेसिका गुरूङको सामना गर्नेछिन् । त्यसैगरी, गल्र्स अण्डर १७ मा पनि आर्मीकै रसिला महर्जन फाइनल प्रवेश गरेकी हुन् । महर्जनले पाल्पाकी दिया शाक्यलाई २१–२ र २१–५ को सेटमा हराउँदै फाइलनमा प्रवेश गरेकी हुन् । गल्र्स अण्डर १७ को अर्को सेमिफाइनल खेलमा कैलालीकी प्राथना देउवा फाइनलमा प्रवेश गरेकी छन् ।
देउवाले मोरङकी रोज पाण्डेलाई २१–१२ र २१–१२ को सेटमा हराउँदै फाइनल प्रवेश गरेकी हुन् । प्रतियोगितामा ब्याइज अण्डर १७ मा त्रिभुवन आर्मीका आयुष्मान नागरी र सुर्खेतका नरेन्द्र बम फाइनल प्रवेश गरेका छन् ।