नारायणगढ । लेखक एवम् व्यवसायी जीवा लामिछानेको पुस्तक ‘सरसर्ती संसार’ र ‘देश देशावर’माथि शुक्रबार नारायणगढमा चर्चा गरिएको छ ।
राष्ट्रिय तथा अन्तर्राष्ट्रिय व्यवसायमा विगत २५ वर्षभन्दा लामो समयदेखि सक्रिय रहेका लामिछानेको यी दुवै पुस्तक नियात्रासङ्ग्रह हुन् ।
अन्तर्राष्ट्रिय व्यवसायको सिलसिलामा विश्वका विभिन्न देश घुम्ने क्रममा देखेभोगेका विषयवस्तुलाई साहित्यिक शैलीमा पुस्तकको स्वरुप दिइएको लेखक लामिछानेले बताए । दुवै पुस्तक यात्राकै क्रममा गरेका टिपोर्टको आधारमा तयार भएकोले विदेशको यात्रा नगरेकाहरुले पनि पुस्तक पढिसकेपछि यात्राको अनुभूति गर्न पाउने अपेक्षासहित पुस्तक प्रकाशनमा ल्याएको उनले बताए ।
पुस्तकमाथि चर्चा गर्दै समीक्षक उदय अधिकारीले पाठकलाई यी दुवै पुस्तकले सकारात्मक प्रभाव पार्नेमा दुईमत नभएको बताए ।
‘पाठकलाई देश घुमाउने मात्र होइन, त्यहाँका सकारात्मक तथा नकारात्मक दुवै प्रकारका गतिविधिको जानकारी गराएको छ’, उनले भने । कतै भ्रष्टाचारैभ्रष्टाचार त कतै भ्रष्टाचारमा शून्य रहेका देशका बारेमा पनि पुस्तकमा चर्चा गरिएको छ ।
‘अधिकांश लेखकले पहिलो पुस्तक राम्रो लेखे पनि पहिलेको तुलनामा त्यसपछिका कृति केही कमजोर हुन्छन्, तर तपाईं (जीवा लामिछाने) त दोस्रो पुस्तकमा झन् बलियो र सक्षम बन्नुभएको रहेछ’, उनले भने । यही पुस्तकबाट विश्वका विभिन्न देशमध्ये केही देशमा रहेका सकारात्मक प्रयासलाई नेपालमा पनि लागू गर्न सके नेपालमा समेत विकृति तथा विसङ्गतिलाई दूर गर्न सकिने उनले बताए ।
समीक्षक तथा लेखक डिआर पोखरेलले पनि नियात्रा भएकोले पुस्तकका हरेक वाक्यले पाठकको मन छुने बताए । अन्तर्राष्ट्रिय व्यवसायमा समय बिताइरहेका व्यक्तिले पनि यति राम्रो सिर्जना गर्न सक्नु ज्यादै सकारात्मक कुरा भएको उनले बताए ।
हाडजोर्नी विशेषज्ञ एवम् लेखक डा. कृष्णप्रसाद पौडेलले मानिस जुन देशमा रहे पनि आफ्नो देशको माया उत्तिकै हुने हुँदा लेखकका हरेक लेखमा नेपालसँग तुलना भएको पाइएको बताए । सम्पूर्ण किताबले आयोजना गरेको कार्यक्रमलाई पत्रकार एवम् लेखक विनोदबाबु रिजालले सहजीकरण गरेका थिए ।
Discussion about this post