सुकुमबासीले जग्गा पाए, घर पनि बनाए

होमनाथ सापकोटा
रत्ननगर । कमजोर आर्थिक अवस्थाका कारण लामो समयसम्म कष्टकर जीवनयापन गरिरहेका रत्ननगरका सुकुमबासीले पक्की घर बनाएका छन् । सुकुमबासी व्यवस्थापन कार्यक्रमअन्तर्गत लुमन्ती आवासका लागि सहयोग समूह रत्ननगरको ऋण सहयोगमा सुकुमबासीहरुले पक्की घर बनाएका हुन् ।
सुकुमबासी व्यवस्थापनको लागि रत्ननगर नगरपालिकासँग सहकार्य गरेर रत्ननगर–३ लौरीघोलमा लुमन्तीले आवास व्यवस्थापनको काम गरेको हो । कुनै समय राम्रो ओत लाग्ने घरको अभावमा कष्टकर जीवन बिताइरहेका सुकुमबासीहरुले ऋण सहयोगमा घर बनाउन पाएपछि राहतको महसुस गरेका छन् ।
रत्ननगर–३ लौरीघोलमा रहेका ४३ घरघुरीमध्ये अति विपन्न २९ परिवारलाई पक्की घर बनाउन ऋण सहयोग भएको हो । तीन वर्षअघिसम्म लथालिङ्ग सो सुकुमबासी बस्ती अहिले पक्की घर बनेपछि व्यवस्थित भएको छ । लुमन्तीको सहयोगमा सो बस्तीमा २९ वटा पक्की घर बनेका छन् ।
‘पहिलो कसको जग्गा कहाँ छ भनेर कसैलाई थाहा थिएन’, नेपाल सुकुमबासी सुधार समितिका अध्यक्ष पूmलमान तामाङले भने सुकुमबासी व्यवस्थापन कार्यक्रम सुरू भएपछि सबैले जग्गा पनि पाए घर पनि बनाए ।
लौरीघोलमा २०५३ सालमा सुकुमबासीको बस्ती बसेको हो । त्यसको एक वर्षमै उनीहरुले २०५४ सालमा लालपुर्जा पाएका थिए । प्रत्येक घरधुरीको तीनधुर जग्गा छ । त्यही तीन धुर जग्गालाई व्यवस्थापन गरेर सबैले पक्की घर बनाएका छन् । प्रत्येक घरधुरीलाई लुमन्तीले एक लाख ऋण सहयोग गरेको छ ।
‘एक लाख दिएर घर बनाएको भन्दा पनि बस्ती व्यवस्थित भएर सबैले आफ्नो जग्गा पाएकोमा खुसी छन्’, सुकुमबासी सुधार समितिका अध्यक्ष तामाङले भने, ‘बस्तीमा पहिलाको भन्दा कायपलट भएको छ ।’
लौरीघोलको सुकुमबासी व्यवस्थापनको लागि लुमन्तीले आवास र आयआर्जन तथा रत्ननगर नगरपालिकाले घोल पुरेर सहज बनाइदिएको छ । नगरपालिकाले झण्डै १० लाख लगानी गरी घोल पुरेर सहज रुपमा घर बनाउन सक्ने व्यवस्था गरेको नेपाल सुकुमबासी सुधार समितिका अध्यक्ष फूलमान तामाङले बताए ।
सुकुमबासी व्यवस्थापन कार्यक्रमअन्तर्गत लुमन्तीमार्फत आक्का परियोजनाले ३० लाखको कोष बनाएर आकृति महिला बचत तथा ऋण सहकारीबाट न्यून व्याजदरमा ऋण दिने गरिएको छ । कोष समुदायलाई नै हस्तान्तरण गरी समुदायबाट सञ्चालन गरिएको छ । कोष र आयआर्जनको लागि सञ्चालन हुने कार्यक्रमको लागि हरेक महिलाहरु बैठक बसेर निर्णय गर्ने गरेका छन् ।