नेपालमा नाम चलाइएका निजी अस्पतालहरु व्यापारिक क्षेत्रभन्दा कुनै पनि मानेमा फरक देखिन छाडेको वर्षौं भइसकेको छ । यस्ता अस्पतालहरु सर्वसाधारणको पहुँचभन्दा टाढा भइसकेका छन् । स्तरीय उपचार सेवा दिने भनिएका अस्पतालहरु नितान्त कमाउने उद्देश्यबाट सञ्चालन भइरहेका छन् । मानवीय सेवा र भावना भन्ने कुरा निजी अस्पतालका लागि टाढाको विषय भइसकेको छ । अस्पतालजस्तो संवेदनशील क्षेत्रमा लुट मच्चिरहँदा पनि राज्यको ध्यान पुग्न सकेको छैन । राज्यले स्वास्थ्य क्षेत्रमा मापदण्डविपरीत लुट भइरहँदा पनि त्यस्ता अस्पतालहरुलाई कारबाही गर्न सकेको छैन । निजी अस्पतालको लुटतन्त्रविरूद्ध सरकारी संयन्त्रले आँखा चिम्लिँदा दिनहुँ सयौँ बिरामीहरु उपचारका नाममा लुटिनु परेको छ । निजी अस्पतालहरुमा चिकित्सकले बिरामी सिफारिस गरेबापत निश्चित कमिसन दिने संस्कार छ । कुनै एउटा कम्पनीको औषधि सिफारिस गरेबापत गाडी र आकर्षक कमिसन दिने चलन पनि विद्यमान नै छ । एम्बुलेन्स चालकलाई एक बिरामीबापत एक हजारदेखि पन्ध्र हजार रूपैयाँसम्म कमिसन दिने गरेको खबरले अस्पतालहरुमा हुने लुटेरा प्रवृत्ति उदाङ्गो भएको छ ।
हालैमात्र राजधानीका नाम चलेका निजी अस्पतालका सञ्चालकहरुसमेत चितवन धाएर एम्बुलेन्स चालकहरुसँग कमिसनको विषयमा छलफल गरेको खबरले यतिखेर सर्वसाधारणलाई आहत बनाएको छ । उपचार सेवा सर्वसाधारणको पहुँचबाहिर रहेको अवस्थामा अस्पतालका मालिकहरुले को प्रलोभन देखाएर फकाउन आएको प्रसङ्गले सबैलाई झस्काएको छ । बिरामी बोकेर उपचारका लागि लैजाँदा बाटोमै रकमको मोलमोलाइ हुनु विडम्बना हो । स्वास्थ्य क्षेत्रमा देखिएको यस्तो रोगले भविष्यमा सर्वसाधारण कसरी उपचार गराउन सक्लान्, यो एउटा गम्भीर चिन्तनको विषय भएको छ । एम्बुलेन्स चालकलाई दिइने कमिसन अन्ततः अस्पतालले बिरामीबाटै असुलउपर गर्ने हो । विभिन्न ठाउँमा कमिसन दिएर भर्ना गरिएका बिरामीले सस्तो र सहुलियतमा कसरी उपचार सेवा प्राप्त गर्लान् ? यो एउटा सोचनीय प्रश्न हो । संवेदनशील अवस्थाका बिरामीलाई अति आवश्यकीय परीक्षणबाहेक पनि महँगा परीक्षण गर्न बाध्य बनाएर सरासर लुट्ने प्रवृत्ति डरलाग्दो छ ।
एम्बुलेन्स चालकले बिरामीलाई सम्बन्धित अस्पतालमा पु¥याएबापत निश्चित भाडा पाउँछन् । बिरामीलाई सुरक्षित रुपमा अस्पतालसम्म पु¥याउनु चालकहरुको दायित्व हो । एम्बुलेन्स सेवा सञ्चालन गर्ने संस्थाले उनीहरुका लागि सेवासुविधा दिँदादिँदै पनि कमिसनको प्रलोभनमा परेर लुटेरा अस्पतालमा बिरामी लैजानु गम्भीर लापरबाही हो । बिरामीको संवेदनशीलताभन्दा पनि कमाउने लोभमा परेर निजी अस्पतालहरुमा बिरामी पु¥याउनु दुर्भाग्य हो । पैसाकै लोभमा अस्पतालहरुले बिरामीलाई उपचारका नाममा धेरै दिनसम्म भर्ना गर्ने, आवश्यकताबिना नै एमआरआई÷सिटीस्क्यानजस्ता महँगा परीक्षण गर्न बाध्य बनाउने गर्दछन् । केही समयअघिदेखि एम्बुलेन्स चालक र सम्बन्धित अस्पतालबीचको गैरकानुनी सम्बन्ध समाचारमार्फत सार्वजनिक हुँदै आए पनि यो समस्या निर्मूल हुन सकेको छैन । सरकारले यस्ता विकृतिहरुको अन्त्य गर्नका लागि अस्पतालहरुमा नियमित अनुगमन गर्नु जरूरी छ । अस्पतालहरुबाट दिइने उपचार सेवा शुल्कको मापदण्ड बनाउन नसके भविष्यमा अस्पतालका नाममा धेरै लुटेराहरुले खुलेआम लुट्न अग्रसर भइरहने निश्चित छ ।
Discussion about this post