गैँडाकोट । नवलपरासी (पूर्व) गैँडाकोट नगरपालिका वार्ड नं ४ निवासी समाजसेवी ओमबहादुर पुन मगरले यही माघ १५ गते परेको आफ्नो ४७ औँ जन्मदिनको अवसरमा तथा नेपाल मगर संघ साबिक गैँडाकोट गाविसका संस्थापक अध्यक्ष निजको बुवा स्व.टेकबहादुर पुन मगर र आमा स्व.मनसुब्बा पुन मगरको स्मृतिमा आर्थिक सहयोग गरेका छन् ।
नेपाल मगर संघ गैँडाकोट नगरपालिकाको नगर इकाइ समितिका निवर्तमान सहसचिवलगायत अन्य सामाजिक संघ–संस्थामा आबद्ध भएका मगरले गरिब तथा जेहेन्दार विद्याथीको छात्रवृत्ति कार्यक्रम सहयोगार्थ रमिता सारू मगर स्मृति प्रतिष्ठान नेपाललाई पाँचहजार पाँच रूपैयाँ रकम प्रदान गरेका हुन् ।
प्रतिष्ठानका सचिव देवेन्द्र सारू मगरले सो रकम ग्रहण गर्दै सहयोगी मनकारी दाताले समुदायप्रति देखाएको सेवाभावको लागि धन्यवाद र आभार प्रकट गरे ।
विसं २०७२ सालमा स्थापना भएको सो प्रतिष्ठानले नवलपरासी (पूर्व) बौंदीकाली गाउँपालिकास्थित बेलभञ्ज्याङ माविमा अध्ययनरत गरिब तथा जेहेन्दार विद्यार्थीहरूको सहयोगार्थ अक्षयकोष स्थापना गरी हरेक वर्ष छात्रवृत्ति वितरण गर्दै आएको छ ।
Discussion about this post