संविधानसभा उपनिर्वाचनको तयारी पूरा

बसन्त पराजुली
भरतपुर । भोलि आइतबार हुने चितवन क्षेत्र नम्बर ४ को संविधानसभा उपनिर्वाचनको अन्तिम तयारी पूरा भएको छ । निर्वाचन गराउनका लागि हरेक मतदान केन्द्रमा मतदान अधिकृतसहितका कर्मचारीहरु पुगी मतदान स्थल निर्माणको कार्यसमेत सकेका छन् ।
‘सबै कर्मचारीहरु मतदान केन्द्रमा पुगेर मतदान केन्द्रको तयारी पूरा गरिसकेका छन्’, मुख्य निर्वाचन कार्यालय चितवन क्षेत्र नम्बर ४ का नायव सुब्बा जयनारायण आचार्यले बताउनुभयो । चितवनको क्षेत्र नम्बर ४ मा ३१ स्थानमा ८१ वटा मतदान केन्द्र छन् । अहिले निर्वाचन गराउनका लागि ८१ मतदान अधिकृतसहित १६६ कर्मचारी खटिएका छन् । खटिएका कर्मचारीहरुले थप मतदाताको परिचयपत्र समेत बाँढ्न सुरू गरिसकेका छन् ।
‘हरेक मतदान केन्द्रमा सर्वदलीय बैठक राखेर मतदान केन्द्रको पूर्व तयारी अवस्था राखिएको छ’, निर्वाचनमा खटिएका एक मतदान अधिकृतले जनाए । यो पटक विद्युतीय मेशिनबाट मतदान गराइने भएकाले पनि सबै केन्द्रहरुमा यो मेशिन पु¥याइ सकिएको छ । केन्द्रमा पुगेका कर्मचारीहरुलाई निर्वाचनको लागि सहज वातावरण बनाउन राजनैतिक दलका स्थानीय कार्यकर्ता तथा स्वयम्सेवकहरुले पनि सहयोग गरिरहेका छन् ।
उपनिर्वाचनको दिन भएकाले सरकारले आइतबार चितवनमा पनि सार्वजनिक बिदा घोषणा गरेको छ भने जिल्ला प्रशासन कार्यालय चितवनले सूचना जारी गरी निर्वाचन हुने क्षेत्रभित्र अनुमति प्राप्त सवारीसाधन बाहेक अन्य साधन सञ्चालनमा रोक लगाएको छ । सवारीसाधनको नियन्त्रणका लागि स्थानीय प्रशासनले चितवन क्षेत्र नम्बर ४ लाई ब्लक गरी १४ वटा नाकासमेत बनाएको छ ।
‘भित्री बाटाहरुबाट समेत सवारीसाधन सञ्चालन हुन्छन् कि भनेर हामीले निगरानी राख्ने छांै’, प्रहरी उपरीक्षक प्रद्युम्न कार्कीले बताउनुभयो । एम्बुलेन्स, दमकल तथा बिरामी बोकेको र शव बोकेका सवारीसाधनलाई भने आवागमनमा कुनै अवरोध नगराइने बताइएको छ ।
मतदान केन्द्रबाट मतपेटिका ल्याउनका लागि हरेक मतदान केन्द्रमा एक–एक वटा बसको व्यवस्था मिलाइएको चितवनका प्रमुख जिल्ला अधिकारी नरेन्द्रराज शर्माले जानकारी दिनुभयो । ‘मतदान सकिएको एक दुई घण्टाभित्रै मतपेटिका सदरमुकाम ल्याउने तयारीमा छौं’, प्रजिअ शर्माले भन्नुभयो, ‘सुरक्षा व्यवस्था पनि मतदान पूर्व, मतदानका दिन र मतदान सकिएपछि मतपेटिका ल्याउनका लागि भनेर छुट्टाछुट्टै तीन चरणको सुरक्षा रणनीति अवलम्वन गरिएको छ ।’
निवाचनका समयमा कुनै स्थानमा समस्या उत्पन्न भए पाँचदेखि दस मिनेटभित्र थप सुरक्षाकर्मी पुग्ने व्यवस्थासमेत मिलाइएको छ । यसका लागि सशस्त्र प्रहरी र नेपाल प्रहरी यस पटकको निर्वाचनमा खटिँदै छन् ।
निर्वाचन शान्तिपूर्ण र धाँधलीरहित बनाउनका लागि अनुगमनको व्यवस्था पनि तीव्र बनाइएको छ । जिल्ला प्रशासन कार्यालय चितवनले सहायक प्रमुख जिल्ला अधिकारी शिवराम गेलालको संयोजकत्वमा अनुगमनका लागि विशेष टाक्स फोर्ससमेत बनाएको छ ।
जिल्लास्थित सुरक्षा निकायका प्रमुख तथा प्रमुख जिल्ला अधिकारीको टोलीसमेत निर्वाचनको अनुगमनमा रहने बताइएको छ । निर्वाचनको अनुगनका लागि निर्वाचन आयोग तथा विभिन्न संघसंस्थाहरुले समेत प्रतिनिधिहरु खटाइसकेका छन् ।
यस पटकको उपनिर्वाचनमा चितवन क्षेत्र नम्बर ४ मा ६५ हजार २९९ मतदाता सहभागी हुनेछन् । यो संख्या गत मंसिरमा भएको संविधानसभाको निर्वाचनभन्दा ५ हजार बढी हो । निर्वाचनमा एक स्वतन्त्रसहित १२ जना उम्मेदवार चुनावी मैदानमा छन् ।