नवलपुर । ग्रील तथा स्टील व्यवसायी संघ नवलपुरले चियापान, पदस्थापना तथा बिदाइ कार्यक्रम गरेको छ । शुक्रबार कावासोतीमा भएको कार्यक्रममा निवर्तमान कार्यसमितिलाई बिदाइ तथा नवनिर्वाचित समितिलाई पदस्थापनासहित पद हस्तान्तरण भएको हो ।
विघटित प्रतिनिधिसभा सदस्य तिलक महतको प्रमुख आतिथ्यतामा भएको कार्यक्रममा व्यवसायीहरुको प्रतिनिधित्व गर्दै बोल्ने वक्ताहरुले फलाममा भएको मूल्य वृद्धि, भाडामा ठाउँ लिएर सञ्चालित उद्योग घर मालिकका कारण ठाउँ सरिराख्नुपर्ने अवस्था, उद्योग सञ्चालनका लागि आवश्यक पर्ने विद्युत् क्षमता नहुनुलगायतका कारणले व्यवसायी मर्कामा परेको बताएका थिए ।
कार्यक्रमका प्रमुख अतिथि तिलक महतले नवलपुरको गौरवका रुपमा रहेको धौबादी फलाम खानी कार्यान्वयनमा ल्याउन सरकार लागिपरेको जिकिर गर्दै धौबादीबाट फलाम उत्पादनको काम सुरू हुँदा सबैभन्दा पहिले प्रत्यक्ष लाभ नवलपुरका व्यवसायीलाई हुने दाबी गरे । उनले विद्युत्को समस्याका लागि सम्बन्धित कार्यालयसँग समन्वयका लागि सघाउने जनाएका छन् ।
कार्यक्रममा निवर्तमान समितिका पदाधिकारी एवं सदस्य सबैलाई सम्मानका साथ बिदाइ गरिएको थियो भने नवनिर्वाचित कार्यसमितिका पदाधिकारी एवं सदस्यलाई स्वागत गर्दै पदस्थापना गरिएको हो । नवनिर्वाचित समितिका अध्यक्ष महेन्द्र श्रेष्ठको अध्यक्षतामा भएको कार्यक्रममा कावासोती नगरपालिका वडा नं–३ का अध्यक्ष अमृत श्रेष्ठले बोलेका थिए । पेसागत संघमा जिल्लाभरिका करिब १ सय २० उद्योग सञ्चालक आबद्ध छन् ।
Discussion about this post