खेमनाथ स्मृति छात्रवृत्ति वितरण

गंगानगर । माध्यमिक विद्यालय भरतपुर–१३, गंगानगरमा स्थापित खेमनाथ सापकोटा स्मृति अक्षयकोषले विद्यालयमा अध्ययन गर्ने अतिविपन्न र दलित समुदायका ६९ जना छात्रछात्राहरुलाई छात्रवृत्तिस्वरुप पाठ्यपुस्तक वितरण गरेको छ । स्वर्गीय खेमनाथ सापकोटाको पाँचौँ पुण्यस्मृतिको अवसरमा पाठ्यपुस्तक वितरण गरिएको हो ।

कार्यक्रमका प्रमुख अतिथि विद्यालय व्यवस्थापन समितिका अध्यक्ष सुदीप सुवेदीले विद्यालयको शैक्षिक तथा भौतिक उन्नयनमा स्थापित अक्षयकोषले ठूलो सहयोग पु¥याउने बताए ।

स्थापित अक्षयकोषबाट विगतका वर्षहरुमा नगद छात्रवृत्ति वितरण गर्ने गरेकोमा यसपटक नगद नभई पुस्तक प्रदान गरिएको अक्षयकोषका अध्यक्ष रामजीप्रसाद सापकोटाले बताए । स्थानीय विद्यालयको शैक्षिक तथा भौतिक बिकासमा केही मद्दत पुगोस् र विद्यार्थीहरुलाई पनि राहत होस् भन्ने उद्देश्यले कोषको स्थापना गरिएको उनले बताए ।

तीन दाजुभाइ रामजीप्रसाद सापकोटा, रामप्रसाद सापकोटा र विश्व सापकोटाले तीन लाख पाँच हजारको अक्षयकोष स्थापना गरेका हुन् । कोषबाट प्राप्त व्याजले हरेक वर्ष छात्रवृत्ति प्रदान गर्ने गरिएको छ । कार्यक्रम विद्यालयका प्राचार्य श्रीराम देवकोटाले स्वर्गीय खिमनाथ सापकोटाले लोकतन्त्र स्थापना, समाजको विकास र परिवर्तनमा पु¥याएको योगदानको चर्चा गरेका थिए ।