भरतपुर । भरतपुर महानगरपालिकाभित्र भएका विभिन्न विकास निर्माणका सम्बन्धमा हेलो सरकारमा आठवटा उजुरी परेका छन् ।
महानगरका प्रमुख प्रशासकीय अधिकृत प्रेमराज जोशीले कार्यालयको बजेटबाट निर्माण भएका र भइरहेका केही विकास योजनालाई लिएर हेलो सरकारमा उजुरी परेको जानकारी दिए । हेलो सरकारमा परेको उजुरीको जवाफ महानगरबाट पठाइएको र सबै उजुरीको फस्र्योटसमेत भएको उनले बताए ।
महानगरपालिका कार्यालयको नाममा परेको मुद्दा ११ वटा रहेकोमा तीनवटा मुद्दा चितवन जिल्ला अदालतले खारेज गरिदिएको छ । कार्यालयको नाममा ११ वटा र हेलो सरकारमा विकास निर्माणसँग सम्बन्धित आठवटा उजुरी परेको उनले बताए ।
सबैभन्दा बढी सडक पिचसँग सम्बन्धित गुनासो हेलो सरकारमा पुगेको छ । हेलो सरकारमा पुगेका गुनासाहरुको सम्बोधन भएको उनले बताए । कतिपय घटनामा भने महानगरपालिकाको प्राविधिक अध्ययन अनुगमनबाट सुधार गर्नू भनी दिएका सुझाव नै हेलो सरकारमा परेको प्रमुख प्रशासकीय अधिकृत जोशीले बताए ।
‘भरतपुर वडा नम्बर–२४ मा भएको पिच स्टिमेटअनुसार गुणस्तरीय नभएको भनी हामीले ठेकेदार पक्षलाई तत्काल सच्याउनका लागि भनेका थियौँ, हेलो सरकारमा पनि सोही व्यहोराको गुनासो पुगेको रहेछ’, प्रमुख प्रशासकीय अधिकृत जोशीले भने, ‘गुणस्तरीय विकास निर्माणमा महानगर प्रतिबद्ध छ ।’
सडक पिच, विद्यालय भवन निर्माणमा अनियमितता विषयमा बढी गुनासो परेको उनले बताए । त्यस्तै, नारायणी नदीकिनारमा बनिरहेको सी बिच मोडलको विषयमा हेलो सरकारमा उजुरी परेको थियो । कोभिड प्रयोगशालामा काम गर्ने कर्मचारीले भत्ता नपाएको भनी उजुरी हेलो सरकारमा परेको उनले जानकारी दिए ।
चालू आर्थिक वर्षमा १३ थान मुद्दा महानगरको न्यायिक समितिमा दर्ता भएको छ । ३९ वटा ठाडो निवेदन परेको छ । रकम लेनदेन, घरमा काम लगाई पारिश्रमिक नदिएको, श्रीमान्श्रीमतीबीचको झगडा, छिमेकीबीचको झगडा आदि विषयमा उजुरी परेको महानगरका प्रवक्ता एवम् वडा नं–१० का अध्यक्ष अरूण पीडित भण्डारीले बताए ।
महानगर स्थानीय सरकारले हालसम्म १४ वटा ऐन जारी गरेको उनले बताए । नियमावली ६ वटा, निर्देशिका ६ वटा, कार्यविधि ३३ वटा, मापदण्ड ४ वटा, आचारसंहिता १ वटा जारी भएको प्रवक्ता भण्डारीले जानकारी दिए ।
Discussion about this post