विद्यालय जान थाले २१ बालश्रमिक

रत्ननगर । परिवारले पालनपोषण तथा शिक्षा दिन नसकेर श्रम बजारमा होमिएका रत्ननगरका २१ जना बालबालिकाहरु विद्यालय जान थालेका छन् ।

रत्ननगर नगरपालिकाभित्र रहेका होटल, रेस्टुरेन्ट, उद्योग तथा घरेलु श्रमिकका रुपमा कार्यरत बालबालिकाहरुलाई श्रमबाट मुक्त गरी विद्यालय भर्ना गरिएको हो । विद्यालय भर्ना गरिएका बालबालिकाहरु नियमित विद्यालय जान थालेका हुन् ।

रत्ननगरमा सञ्चालित बालश्रम न्यूनीकरण कार्यक्रमअन्तर्गत सामुदायिक सेवा केन्द्रले ती बालबालिकाको शिक्षाका लागि विद्यालय भर्ना गरेको हो । एक वर्षअघि श्रमबाट मुक्त गरी खेल्दै सिक्ने केन्द्रमा शिशु तहको अध्यापन गराएर बालबालिकालाई नगरभित्रका दुईवटा सामुदायिक विद्यालयमा भर्ना गरिएको सामुदायिक सेवा केन्द्रकी कोषाध्यक्ष तथा खेल्दै सिक्ने केन्द्रकी संयोजक पार्वती न्यौपानेले जानकारी दिइन् ।

चालू शैक्षिक सत्रमा नेपाल नमुना माविमा ११ जना र पञ्चदीप आधारभूत विद्यालयमा १० जना बालबालिकालाई भर्ना गरिएको हो । नेपाल मावि सेवा क्षेत्रभित्रका बालबालिकालाई सोही विद्यालयमा र पञ्चदीप सेवा क्षेत्रभित्रका बालबालिकालाई सोही विद्यालयमा भर्ना गरिएको न्यौपानेले बताइन् । श्रमबाट मुक्त गरिएका बालबालिकालाई केन्द्रमा राखेर स्वयं सिकाइ, सहजकर्ता सिकाइ, कार्ड सिकाइ र खेलको माध्यमबाट सिकाएर पढाउने गरिएको केन्द्रकी सहजकर्ता तथा शिक्षिका रमिला पुलामीले जानकारी दिइन् ।

घर नजिक भएका बालबालिकालाई केन्द्रमा र घर टाढा भएका बालबालिकालाई घरमै पुगेर पढाउने गरिएको छ । श्रमबाट मुक्त गरिएका बालबालिकालाई अभिभावकको जिम्मा लगाएर शिशु तहको पढाइ केन्द्रले सञ्चालन गर्दै आएको छ । कक्षा एकमा भर्ना गर्ने उमेर र सिकाइको स्तर पुगेका बालबालिकाहरुलाई वार्षिकरुपमा विद्यालयमा भर्ना गर्ने गरिएको छ । विद्यालय भर्ना गरिएका बालबालिकालाई पोसाक, स्कुल ब्याग, स्टेसनरी प्रदान गरिएको छ । आइतबार नेपाल मावि र सोमबार पञ्चदीप आधारभूत विद्यालयमा बालबालिकालाई भर्ना गरिएको छ । यद्यपि, उनीहरु एक महिनाअघिबाट विद्यालय जान थालेका थिए ।

केन्द्रकी संयोजक न्यौपानेले नेपाल माविका सहायक प्रधानाध्यापक गुरूप्रसाद अधिकारी र पञ्चदीपकी प्रधानाध्यापक शर्मिला भट्टलाई बालबालिकालाई आवश्यक पर्ने पोसाक, ब्यागसहित स्टेसनरी हस्तान्तरण गरेकी थिइन् । केन्द्रले भर्ना गरेका बालबालिका विद्यालय सेवा क्षेत्रभित्रका रहेको र उनीहरु नियमित विद्यालय आउने गरेको प्रधानाध्यापक भट्टले बताइन् । विद्यालय भर्ना गरिएका बालबालिकामध्ये केही विद्यालय नै नगई श्रममा लागेका र केही बीचमा पढाइ छाडेर श्रममा होमिएका बालबालिका हुन् । उनीहरु कक्षा एकदेखि पाँचसम्मका छन् ।