धादिङ । धादिङको धुनिबेँसीमा स्थापना गरिएको जर्मन प्राविधिक शिक्षालयलाई जर्मनीको एक संस्थाले ५० लाख मूल्य बराबरको विभिन्न उपकरणहरु प्रदान गरेको छ ।
ठूला जलविद्युत् आयोजनाको निर्माण, सञ्चालन र मर्मतसम्भारका लागि आवश्यक जनशक्ति तयार गर्ने उद्देश्यका साथ जर्मनीस्थित स्टेल्वा हाइड्रो कम्पनीले धादिङको धुनिबेँसी नगरपालिका वडा नं ५ ढकालखोलामा स्थापना गरेको सो शिक्षालयलाई अत्याधुनिक खालका टर्वाइन र अटोमेसन उपकरण प्रदान गरेको हो ।
शेषकान्त फाउन्डेसनद्वारा सञ्चालित सो शिक्षालयमा अध्ययनरत विद्यार्थीलाई प्राविधिक शिक्षा दिनका लागि आवश्यक पर्ने उपकरण सहयोगसम्बन्धी तालिम लिनेहरुका लागि ती उपकरणहरुबाट व्यावहारिक ज्ञान दिन सहयोग पुग्ने सो कम्पनीका प्राविधिक निर्देशक पवन ढकालले बताए । विदेशमा सिकेको ज्ञान र पुँजी स्वदेशमै लगानी गर्ने उद्देश्यले सन् २०१५ देखि नै धादिङ जिल्लामा विभिन्न शैक्षिक क्रियाकलाप सञ्चालन गर्दै आएको ढकालले बताए ।
शिक्षालयबाट एक व्याच उत्तीर्ण भइसकेका छन् भने कोभिड–१९ का कारण केही ढिलाइ भए पनि आगामी वैशाखदेखि अर्को समूहको तालिम सुरू गरिने फाउन्डेसनका अध्यक्ष विश्वश्वरप्रसाद ढकालले जानकारी दिए ।
अध्यक्ष ढकालका अनुसार गैरआवासीय नेपाली संघ (एनआरएनए)को नेपालमा व्यावसायिक शिक्षा सहयोग कार्यक्रमअन्तर्गत नेपाल स्वतन्त्र विद्युत् उत्पादक संघ (इपान)सँगको सहकार्यमा तालिम सञ्चालनमा आएको हो ।
चार करोड ६० लाखको लागतमा शिक्षालयमा ४० जना विद्यार्थी बस्न मिल्ने होस्टल र १८ कोठा भएको अलग्गै विद्यालय भवन निर्माण भएको छ भने नेपालमै सस्तो, किफायती र सुरक्षित प्रिफाइभ ढाँचाका घरहरु निर्माण गर्न आवश्यक उपकरण र दक्ष जनशक्ति तयार गर्न एक जर्मनी कम्पनीसँग सहकार्य गरिएको शिक्षालयले जनाएको छ ।
Discussion about this post