जुम्ल्याहा दाजुभाइ र दृष्टिविहीनलाई सफलता

–सुमन गैरे
भरतपुर । हालै सार्वजनिक भएको एसएलसी परीक्षामा चितवनका जुम्ल्याहा दाजुभाइले विशिष्ट श्रेणी र एक दृष्टिविहीन विद्यार्थी  प्रथम श्रेणीमा उत्तीर्ण भएका छन् । सामुदायिक विद्यालयतर्फ एक र संस्थागत विद्यालयतर्फ २० विद्यालयले शत्प्रतिशत नतिजा ल्याएका छन् भने एक विद्यालय ‘निल’ भएको छ ।
भनपा–९ स्थित गौरीगञ्ज पोलरस्टार आवासीय माविका सहायक प्रिन्सिपल दयानिधि अर्यालले दिएको जानकारीअनुसार सो विद्यालयका जुम्ल्याहा दाजुभाइले विशिष्ट श्रेणीमा एसएलसी उत्तीर्ण गरेका छन् । बसन्त सापकोटाले ८४. १ र शिशिर सापकोटाले ८२.२ प्रतिशत अंक ल्याएका हुन् ।  उक्त विद्यालयबाट २० जना विशिष्ट, ३५ जना प्रथम र एक जना द्वितीय श्रेणीमा पास भएको प्रिन्सिपल भानु कँडेलले जानकारी दिए ।
यसैगरी नारायणी उच्च माविबाट ब्रेल लिपिमा अध्ययन गरी परीक्षा दिएका दृष्टिविहीन विद्यार्थी सुनिता घिमिरे र झुवानी माविका सुशीला गिरीले प्रथम श्रेणीमा उत्तीर्ण भएका छन् । झुवानीकै विजयीता महतो र विनोद अधिकारीले द्वितीय श्रेणीमा उत्तीर्ण गरेका छन् ।
जिल्ला शिक्षा कार्यालयले दिएको जानकारीअनुसार एसएलसीको प्रारम्भिक नतिजामा जिल्लाका ९४ सामुदायिक विद्यालयमध्ये सरस्वती मावि मधुपुरीले शतप्रतिशत् नतिजा हासिल गरेको छ । यस्तै सिद्धि गाविसमा रहेको राष्ट्रिय मावि मझबाङले कुनै पनि विद्यार्थी उत्तीर्ण गराउन सकेन । यस्तै, १०८ संस्थागत विद्यालयमध्ये २० वटा विद्यालयले सत्प्रतिशत विद्यार्थी उत्तीर्ण गराउन सफल भएका छन् ।