‘उपनिर्वाचनका सबै ठाउँमा कांग्रेसको जित’

भरतपुर । नेपाली कांग्रेसका शीर्ष नेताहरुले उपनिर्वाचन हुने क्षेत्रहरुमा कांग्रेसको जित सुनिश्चित रहेको बताएका छन् । नेपाली कांग्रेस गीतानगर गाउँ समितिले मंगलबार गीतानगरमा आयोजना गरेको चुनावी सभालाई सम्बोधन गर्दै कांग्रेसका शीर्ष नेताहरुले चितवन क्षेत्र नं. ४ सहित उपनिर्वाचन हुन लागेका सबै क्षेत्रमा कांग्रेसको जित कसैले रोक्न नसक्ने दावी गरे ।
‘कांग्रेसको जित कसैले रोक्न सक्दैन’, कांग्रेसका वरिष्ठ नेता शेरबहादुर देउवाले भने, ‘उपनिर्वाचन हुने सबै ठाउँमा कांग्रेसको जित सुनिश्चित छ ।’ चितवन क्षेत्र नं. ४ मा त भारी मत अन्तरले प्रतिपक्षीहरुलाई पराजित गर्ने छौँ ।’
नेपाली कांग्रेसको नेतृत्वमा लोकतान्त्रिक संविधान जारी गरेरै छाड्ने प्रतिबद्धता जनाउँदै नेता देउवाले लोकतान्त्रिक संविधान बनाउनका लागि पनि कांग्रेसका उम्मेदवारहरुले जित्नुपर्ने जिकिर गरे । उनले समयमै लोकतान्त्रिक संविधान बन्नेमा विश्वस्त रहन सर्वसाधारणमा अनुरोध पनि गरे ।
‘राजनैतिक स्थिरताका लागि तोकिएकै समयमा संविधान जारी गर्नुपर्ने बाध्यता छ’, उनले भने, ‘पहिलो संविधानसभा सदस्य निर्वाचनमा कांग्रेस हारेकै कारण संविधान बन्न नसकेको हो । अहिले संविधान पनि जारी हुन्छ, सबैको सहमतिमा संविधान आउँछ ।’
चितवन क्षेत्र नं. ४ ले सभापति सुशील कोइरालालाई निर्वाचित गराएको भन्दै यस ठाउँको विकासका लागि आफ्नो प्रयास रहने विस्वास व्यक्त गरे । उनले कांग्रेसका जुझारु कमाण्डर रामकृष्ण घिमिरेलाई निर्वाचित गर्न अपिल गर्दै क्षेत्र ४ का बासिन्दाको समस्या निवारणमा आफ्नो साथ रहने प्रतिवद्धता व्यक्त गरे ।
कार्यक्रममा नेपाली कांग्रेसका उपसभापति रामचन्द्र पौडेलले कांग्रेसले बोलेका कुरा पु¥याएरै छोड्ने पार्टी भएकाले विकास निर्माणमा प्रतिबद्धता गरेका कार्यहरु पूरा गरिछाड्ने धारणा राखे ।
‘कांग्रेस जे भन्छ, त्यो पु¥याउँछ । चुनावका बेला बोलेका कुरा पनि कांग्रेसले इमान्दारिताका साथ पूरा गर्छ’, उनले भने, ‘सुकुम्बासी समस्या समाधान र विकास निर्माणका कुरा कांग्रेसले मात्रै पूरा गर्न सक्छ ।’
दरबारिया र कम्युनिष्ट कहिल्यै पनि प्रजातन्त्रका पक्षमा नरहेको आरोप लगाउँदै उनले साम्यवादीको प्रहार सधँै कांग्रेसमाथि रहेको बताए । दरवारियाले पहिले र कम्युनिष्टले पछिल्लो समय संविधान जारी गर्न अवरोध पु¥याएको आरोप उनको थियो । संविधान र विकासका लागि चितवन क्षेत्र नं. ४ मा कांग्रेसलाई विजयी गराउनुको विकल्प नरहेको उपसभापति पौडेलको भनाइ थियो ।
सभामा अर्का केन्द्रीय सदस्य धनराज गुरुङले कांग्रेस जातीय राज्यको विरोधमा चट्टान झै अडिरहने भन्दै मुलुकमा संविधान दिने अभिभारा कांग्रेसमामात्रै रहेको बताए । सो अवसरमा नेपाली कांग्रेस चितवनका सभापति टेकप्रसाद गुरुङ, सभासद शेषनाथ अधिकारी, कांग्रेस नेतृ मैयादेवी श्रेष्ठ र महासमिति सदस्य दिनेश कोइरालालगायतले मन्तव्य राखेका थिए ।
सो अवसरमा नेकपा एमाले र एकीकृत नेकपा माओवादीबाट स्थानीय नेता तथा कार्यकर्ता कांग्रेसमा प्रवेश गरेका थिए । कार्यक्रम गाउँ समिति सभापति हरिविलास कोइरालाको अध्यक्षतामा सम्पन्न भएको थियो ।