अतिविपन्न र अपाङ्ग विद्यार्थीलाई न्यानो कपडा

खैरहनी । खैरहनी नगरपालिकाले सामुदायिक विद्यालयका अतिविपन्न र फरक क्षमता भएका विद्यार्थीहरुलाई न्यानो कपडा र झोला वितरण गरेको छ ।
नगरपालिकाले आफ्नो आन्तरिक श्रोतबाट खर्च हुने गरी १६५ जना विद्यार्थीलाई न्यानो कपडा र झोला वितरण गरेको हो । खैरहनी नगरपालिकामा २७ वटा सामुदायिक विद्यालय रहेका छन् । बुधबार खैरहनी माध्यमिक विद्यालयबाट वितरण कार्यको उद्घाटन गरिएको थियो ।
नगरपालिका सामाजिक विकास समिति संयोजक मनेजर महतो, नगर प्रवक्ता रामशरण पाण्डे, स्थानीय शिक्षा अधिकारी राजु बानियाँ, स्वास्थ्य शाखा प्रमुख अनुप अधिकारी, खैरहनी माध्यमिक विद्यालय जन्मोत्सव तथा छात्रवृत्ति अक्षयकोषका अध्यक्ष मुरलीप्रसाद गजुरेलको उपस्थितिमा कार्यक्रम भएको थियो ।
त्यस्तै खैरहनी माध्यमिक विद्यालयमा अध्ययनरत विपन्न समुदायका विद्यार्थीहरुलाई लायन्स र लियो क्लबले न्यानो कपडा वितरण गरेका छन् ।
लायन्स क्लब अफ चितवन इष्ट र लियो क्लब अफ चितवन इष्टले सो विद्यालयका ७७ जना विद्यार्थीहरुलाई बुधबार न्यानो कपडा प्रदान गरेको लायन्स क्लब अफ चितवन इष्टका अध्यक्ष भीमबहादुर पाण्डेले जानकारी दिए ।
लायन्स क्लब अफ चितवन इष्टका पूर्वअध्यक्ष बुद्धिराज डल्लाकोटीको आर्थिक सहयोगमा न्यानो कपडा वितरण गरिएको लियो क्लब अफ चितवन इष्टका अध्यक्ष सागर अधिकारीले बताए ।