नारायणी कला मन्दिरको साधारण सभा

नारायणगढ । नारायणी कला मन्दिरले सोमबार संस्थाको ४५औँ वार्षिक साधारण सभा सम्पन्न गरेको छ । कोरोना भाइरस सङ्क्रमण जोखिमका कारण कला मन्दिरले गर्दै आएको नियमित कार्यक्रम गर्न नपाए पनि संस्थाको विधि र विधानअनुसार साधारण सभा सम्पन्न गरेको अध्यक्ष उद्धव जोशीले जानकारी दिए । स्थापनाको आधा शतक पार गरिसकेको संस्थाले नियमित कार्यक्रम गर्न नपाए पनि यसवर्ष कला मन्दिरले हलमा नयाँ कुर्सी राख्ने काम गर्न सफल भएको उनले बताए । प्रदेश सरकार र स्थानीय सरकारको सहयोगमा उक्त काम गर्न सफल भएको उनको भनाइ छ ।
लामो समयदेखि कुनै पनि नियमित तथा नयाँ कार्यक्रम गर्न नपाएकोले कला मन्दिरको आर्थिक पाटो कमजोर बन्दै गएको उनले बताए । आर्थिक सङ्कटको बीचमा कुनै पनि कार्यक्रम गर्न सहज नहुने हुँदा दाताको मुख ताक्नुपर्ने अवस्था सिर्जना भएको उनको भनाइ छ । कला मन्दिरको योजनाअनुसार तालिम हल निर्माण गर्ने विषयले पूर्णता पाउनसमेत समस्या भएको उनले बताए ।
कला मन्दिरका पूर्वअध्यक्ष एवम् सल्लाहकार प्रभातकुमार जोशीले नेतृत्व फेरिए पनि विभिन्न बहानामा कला मन्दिरको कामले समयमै पूर्णता पाउन नसकेको बताए । त्यसमा पूर्वअध्यक्ष तथा सल्लाहकारहरुको भूमिकासमेत कमजोर महसुस हुँदै गएकोले आगामी दिनमा सबैले एकजुट भई कला मन्दिरको उन्नयनमा जोड दिनुपर्ने बताए ।
कार्यक्रममा प्रमुख अतिथिको रुपमा उपस्थित उद्योग वाणिज्य संघ–चितवनका अध्यक्ष राजु श्रेष्ठले कतिपय सामाजिक व्यक्तिहरुले कला मन्दिरकै सेवामा जीवन समर्पित गरेको प्रसङ्ग कोट्टयाउँदै समग्रमा कला मन्दिरले बिस्तारै फड्को मार्दै गएको बताए । सोचेजस्तो तरिकाले काम गर्न सहज नभए पनि बिस्तारै कला मन्दिर स्तरोन्नतिको बाटोतर्फ लम्किरहेको उनको भनाइ छ ।