नारायणी डेभलपमेण्ट बैंकको खस्कँदो आर्थिक कारोवार, धमाधम निक्षेप फिर्ता

दिपेन्द्र अधिकारी
रत्ननगर । चितवनको रत्ननगरमा मुख्य कार्यालय रहेको नारायणी डेभलपमेण्ट बैंकले धमाधम निक्षेप फिर्ता गरिरहेको छ । हालसम्म २४ करोड निक्षेप बाँडी सकिएको र ५८ करोड फिर्ता गर्न अझै बाँकी रहेको बैंकका नवनियुक्त सीईओ मुक्तिनाथ पौडेलले बताए ।
नेपाल राष्ट्र बैंकले २ वर्षअघि नै बैंकको खस्कदो आर्थिक कारोवारका सम्बन्धमा चेतावनी दिएपनि तत्कालीन अध्यक्ष र महाप्रबन्धकले बेवास्ता गर्दा अहिले यस बैंक समस्यामा परेको हो । बैंकका पूर्व संचालक समितिका अध्यक्ष दिव्यकुमार श्रेष्ठ र महाप्रबन्धक वीरेन्द्रकुमार श्रेष्ठले बैंकमा निक्षेप भएको रकम व्याजबाट आम्दानी हुने लोभमा काठमाडौंमा रहेको क्रिष्टल फाइनान्सलाई ३० करोड निक्षेप राख्नका लागि दिएको पाइएको छ ।
अध्यक्ष श्रेष्ठ बैंकिङ कसुरको अपराधमा हाल पुर्पक्षका लागि थुनामा छन् । त्यस्तै तत्कालीन महाप्रबन्धक वीरेन्द्रकुमार श्रेष्ठको समयमा बैंकको रकम खराब ठाउँमा लगानी भएकाले अहिले समस्या आएका कर्मचारीहरु बताउँछन् ।
अध्यक्ष श्रेष्ठले आफू पदमा रहँदा काठमाडौंको क्रिष्टल फाइनान्सलाई ३० करोड निक्षेपका लागि दिएको पाइएको छ । उल्लेखित रकममध्ये १६ करोड उठ्न बाँकी रहेको सीईओ पौडेलले बताए । ‘असुरक्षित ठाउँमा ऋण प्रवाह वा निक्षेप गर्नुले बंैकले यस्तो समस्या भोग्नुपरेको रहेछ,’ पौडेलले भने ।
यस बैंकको स्थापना विसं २०५८ सालमा भएको हो । यस बैंकको गत जेठ महिनासम्मको निक्षेप ५८ करोड ५७ लाख ७४ हजार रुपैयाँ रहेको बैंकका सीईओ पौडेलले बताए । उनकाअनुसार कर्जा ३७ करोड ८ लाख ९३ हजार र बैंक व्यालेन्स १६ करोड ६५ लाख ९० हजार रहेको छ । बैंकको व्याज उठ्न बाँकी रकम ९ करोड रहेको उनले जानकारी दिए । बैंक जग्गाबाट १० करोड असुल गर्न बाँकी छ । त्यस्तै खराब ऋण १२ करोड रहेको छ ।
गत वैशाख १६ गते बैंकको संचालक समितिको बैठकले पौडेललाई सीईओ नियुक्त गरेको हो । बैंकिङ क्षेत्रमा ३२ वर्ष लामो अनुभव बटुलेका पौडेलले समस्यामा रहेको यस बैंकको पुनर्उत्थानका लागि आफू मेहनतका साथ लागिरहेको बताए ।
गत चैत्र २६ गते राष्ट्र बैंकले एक पत्रमार्फत बंैकलाई निक्षेप नलिन भनेको थियो । उनकाअनुसार डेढ महिनाको बीचमा ३ करोड ९२ लाख रुपैयाँ ऋण असुल गरिएको छ । पौडेलका अनुसार ऋणीहरुबाट असुलउपर गर्नका लागि धितो लिलामको काम भटाभट थालिएको छ । उनकाअनुसार बैंकमा नयाँ लगानीकर्ताको खोजी भइरहेको छ ।
त्यस्तै बैंकको लगानी क्षेत्र पनि स्पष्ट पार्न लागिएको छ । बैंकले निकट भविष्यमा साना किसान लक्षित बिमा समेटिएको लगानीको कार्यक्रम ल्याउन लागिएको जानकारी दिए । ‘संस्थापक सेयरका लागि पब्लिकबाट पछिल्लो समय ४ करोडको प्रतिबद्धता आइसकेको छ’, सीईओ पौडेलले भने ।
‘ख’ वर्गको यस बैंकको कार्यक्षेत्र चितवन, नवलपरासी र मकवानपुर रहेको छ । बैंकको पाँचवटा शाखाहरु रहेकामा सबै चितवन जिल्लामा रहेका छन् । रत्ननगर, पर्साबजार, भरतपुर क्यान्सर परिसर, भरतपुर अस्पताल परिसर र पुल्चोक नारायणगढमा शाखा संचालनमा छन् । एउटै मात्र एटीएम सुविधा क्यान्सर शाखाबाट दिइँदै आएकोमा पछिल्लो समय निक्षेप फिर्ता गर्न थालिएपछि बन्द गरिएको सीईओ पौडेलले बताए ।
यस बैंकका निक्षेपकर्ताहरु आफ्नो निक्षेप फिर्ता लिन दैनिक बैंक धाउने गरेका छन् । बैंकमा दैनिकजसो निक्षेप फिर्ता लिनेको भीड लाग्ने गर्छ । समस्यामा परेपछि बैंकले अहिले हप्तासूची बनाइ निक्षेप रकमको आधारमा धमाधम निक्षेप फिर्ता गरिरहेको छ । हप्ताको एकपटक प्रति ग्राहकलाई रकम फिर्ता गरिएको बैंक सम्बद्ध कर्मचारीले बताएका छन् ।
दुई लाखसम्म दस हजार, दुई लाखदेखि पाँच लाखसम्म बीसहजार रुपैयाँ हप्ताको एकपटक फिर्ता गरिएको छ । ५ लाखदेखि दस लाखसम्म तीस हजार । दस लाखदेखि २५ लाखसम्म ५० हजार र २५ लाखरुपैयाँ माथि निक्षेप भएकालाई हप्ताको एक लाख रुपैयाँ निक्षेप फिर्ता गरिएको बैंकले जनाएको छ ।
खराब कर्जाका कारण बैंकको निक्षेप संकलन र ऋण लगानी दुवै कारोवार चैतदेखि नै बन्द गरेको छ ।

निक्षेप फिर्ता लिन लाइनमा बसेका ग्राहकहरु ।