नवलपरासी । नेकपा ओली समूहका स्थायी कमिटी सदस्य एवम् ऊर्जा तथा जलस्रोतमन्त्री टोपबहादुर रायमाझीले नेकपा अध्यक्ष प्रचण्ड सुरूदेखि नै पार्टी फुटाउन लागेको आरोप लगाएका छन् । नवलपरासी पूर्व कावासोतीमा आइतबार अगुवा कार्यकर्ता भेलालाई सम्बोधन गर्दै उनले यस्तो बताएका हुन् ।
नवलपरासी पूर्व कावासोतीस्थित सितारा रिसोर्टमा आयोजित ओली समूहको कार्यकर्ता भेलामा ऊर्जामन्त्री टोपबहादुर रायमाझीले आफ्नै पार्टीका नेता तथा सांसद्हरु पार्टी फुटाउने योजनाका साथ सरकारको विरोधमा उत्रिएको बताए । नेकपा अध्यक्ष प्रचण्डले पूर्वएमालेलाई फुटाउन खोज्दा आफ्नै माओवादीभित्र फुट आएको मेसो नपाएको उनले बताए । आफ्नै पार्टीका नेता र सांसद्हरुले सरकारले गरेका राम्रा कामको प्रचारप्रसार र त्यसलाई स्थापित गर्न छाडेर सरकारको विरोध गर्ने काममात्रै गरेको मन्त्री रायमाझीले आरोप लगाए ।
यस्तै, नेकपा ओली समूहका गण्डकी प्रदेश सहइन्चार्ज एवम् गण्डकी प्रदेशका आर्थिक मामिला तथा योजनामन्त्री किरण गुरूङले संसद् विघटनको मुद्दा सर्वोच्च अदालतले संवैधानिक इजलासमा पठाउनु नै संवैधानिक कदम पुष्टि भएको उल्लेख गरे ।
भेलामा सम्बोधन गर्न मन्त्री रायमाझी कावासोती आएका बेला प्रचण्ड–नेपाल समूहका कार्यकर्ताले कार्यक्रम स्थलबाहिर कालो बेलुनमा असंवैधानिक कदम खारेज गर, गद्दारहरु होसियार लेखेको कालो ब्यानर बनाएर उडाउनुका साथै ठाउँठाउँमा कालो झन्डा र ब्यानर राखेका थिए ।
Discussion about this post