क्षेत्र नंं ४ मा काँग्रेस नै विजयी हुने दावी

भरतपुर । नेपाली काँग्रेसका उपसभापति रामचन्द्र पौडेलले चितवनको क्षेत्र नम्बर ४ मा सभापति सुशील कोइरालाको भन्दा बढी मत ल्याएर संविधानसभा सदस्य उपनिर्वाचनमा काँग्रेस विजयी हुने दावी गर्नुभएको छ ।
चुनाव प्रचारका लागि क्षेत्र नम्बर ४ का चार स्थानमा सोमबार आयोजित अलगअलग कार्यक्रममा सम्बोधन गर्दै उहाँले काँग्रेसको पक्षमा जनलहर बढेको भन्दै अत्यधिक मतले काँग्रेसले निर्वाचन जित्ने दावी गर्नुभयो । उहाँले चितवनको क्षेत्र नम्बर ४ लाई विकासको नमुना क्षेत्र बनाउने प्रतिबद्धता पनि व्यक्त गर्नुभयो ।
पार्टी सभापति कोइरालालाई दोब्बरभन्दा बढी मतले विजयी गराएको भन्दै यस क्षेत्रलाई नमुना क्षेत्र बनाउन काँग्रेस लाग्ने बताउनुभयो । देशकै मध्य भागमा अवस्थित अन्य ७४ जिल्लाका बासिन्दाको संगम थलो रहेको भन्दै उहाँले यस क्षेत्रलाई नमुना क्षेत्र बनाइने बताउनु भएको हो ।
चुनावी सभालाई सम्बोधन गर्दै उहाँले भन्नुभयो, ‘बजेट रकमान्तर गरेर चितवनमा बढी पारेको भनेर सभापति कोइरालालाई एकातिर घेराबन्दी गर्ने, अर्कोतर्फ जितेर के ग¥यांै भनेर प्रश्न गर्ने कम्युनिष्टको कस्तो रवैया हो ।’
सभापति कोइरालाकै निर्देशनमा झण्डै एक अर्ब बजेटको योजना चितवन क्षेत्र नम्बर ४ मा पर्नु यस क्षेत्रका बासिन्दाका लागि गर्वको कुरा रहेको नेता पौडेलले बताउनुभयो । उपसभापति पौडेलले रामकृष्ण घिमिरे व्यक्ति नभएर काँग्रेसको उम्मेदवार रहेको भन्दै घिमिरेका एजेण्डा पूरा गर्ने प्रतिबद्धता व्यक्त गर्नुभयो ।
भरतपुरको बुद्धचोक, चित्रवन नगरपालिकाको गोब्रेनी, फूलबारी र भनपा १३ को आनन्दचोकमा आयोजित अलगअलग सभालाई सम्बोधन गर्दै उपसभापति पौडेलले सो प्रतिबद्धता व्यक्त गर्नुभएको हो । बुद्धचोकमा आयोजित सभा नेपाल महिला संघ भनपा ७ ले आयोजना गरेको हो ।
सो अवसरमा नेपाली काँग्रेसका उम्मेदवार रामकृष्ण घिमिरेले संविधान र चितवनको विकासका लागि आफ्नो उम्मेदवारी रहेको बताउनुभयो ।
यसअघि मझुवा सामुदायिक वन गोब्रेनीमा नेपाल दलित संघ जिल्ला कार्यसमिति चितवनले आयोजना गरेको चुनावी सभामा उपसभापति पौडेलले आयोग बनाएर सुकुमबासी समस्याको समाधान गर्ने प्रतिबद्धता व्यक्त गर्नुभयो ।
त्यस्तै भनपा १३ आनन्दचोमा आयोजित चुनावी सभामा उपसभापति पौडेलसहित पूर्व सांसद जगन्नाथ पौडेल, नेपाली काँग्रेस चितवनका सचिव जितनारायण श्रेष्ठ र चन्द्रप्रसाद पौडेलले क्षेत्र नम्बर ४ का बासिन्दा भाग्यमानी रहेको भन्दै नमुना क्षेत्र बनाउन सबै लाग्नु पर्ने बताउनु भएको थियो ।