भरतपुर । युरेका पब्लिकेशनबाट प्रकाशित चार कृतिमाथि शनिबार समीक्षा गरिएको छ । विनोदबाबु रिजालको एकान्तबास, मणि अर्यालको कुटी, गायत्री अधिकारीको निर्णय र सूर्यप्रकाश कँडेलको मोसो पुस्तकमाथि समीक्षकहरुले टिप्पणी गरेका छन् ।
गएको साउन ३ गते विमोचन भएको एकान्तबासमाथि पत्रकार रमेशकुमार पौडेलले समीक्षात्मक टिप्पणी गरेका थिए । २७६ पेज (७८ वटा अध्याय)को उपन्यास एकान्तबासमा कोरोना कहरमा भोग्न परेका कुराहरुलाई उतारिएको छ । एकान्तबास लेखक रिजालको पहिलो पुस्तक हो ।
२३ वटा कथा समावेश भएको गायत्री अधिकारीको कृति निर्णयमाथि शान्ति शर्माले समीक्षात्मक टिप्पणी गरिन् । पुस्तकमा सामान्य विषयलाई सुक्ष्मरुपमा प्रस्तुत गरिएको उनले बताइन् । समग्रमा पुस्तकले आदर्श स्थापना र सुधारको चेतनालाई बढी प्राथमिकता दिएको उनले बताइन् ।
मणि अर्यालको निबन्धसङ्ग्रह कुटीमाथि सिर्जन अविरलले समीक्षात्मक टिप्पणी गरे । कृति कुटीमा ११ वटा निबन्ध रहेका छन् । लेखक अर्यालका निबन्धहरु पाठ्यपुस्तकमा पनि समावेश गर्न मिल्ने खालका निबन्ध रहेको उनले बताए ।
सूर्यप्रकाश कँडेलको उपन्यास मोसोमाथि बालकृष्ण थपलियाले समीक्षात्मक टिप्पणी गरे । मोसोमा पत्रकारिता क्षेत्रमा काम गर्ने व्यक्तिको आचरणलाई उतारिएको थपलियाले बताए ।
Discussion about this post