चितवनमा कुष्ठरोगीको संस्था घट्दो

रत्ननगर । जिल्ला जनस्वाथ्य कार्यालय चितवनले जिल्लामा कुष्ठरोग निवारणको चरणमा रहेको जनाएको छ । रत्ननगरमा शुक्रबार आयोजित एक कार्यक्रममा कार्यालयले कुष्ठरोग अन्त्य पनि भइनसकेको र विकराल समस्या पनि नरहेको जानकारी दिएको छ ।
पाँच बर्षअघि एक हजारभन्दा बढी कुष्ठरोगी रहेको चितवनमा त्यो संख्या घटेर ५० मा पुगेको छ । पाँच बर्षको तथ्याङ्क र अहिलेको तथ्याङ्क हेर्दा चितवनमा ९५ प्रतिशतले कुष्ठरोगीको संख्या घटेको कार्यालयका क्षयकुष्ठ अधिकृत जयराम दुवाडीले बताउनुभयो ।
नेपाल सरकारले कुष्ठरोगको उल्मूलनको लागि बहुऔषधि उपचार पद्धति लागू गरेपनि चितवनमा कुष्ठरोग निवारणको अवस्थामा पुगेको उहाँले बताउनुभयो । शरीरमा नचिलाउने खालको लाटोफुस्रो दाग आउनु कुष्ठरोगको लक्षण हो ।
कुष्ठरोग सर्ने र नसर्ने दुई प्रकारको छ । शरीरमा ५ वटाभन्दा कम दाग आयो भने त्यो नसर्ने र ५ भन्दाबढी दाग देखिए त्यो सर्ने खालको रोग हो भनेर सजिलै पहिचान गर्न सकिने क्षयकुष्ठ अधिकृत दुवाडीले बताउनुभयो । नसर्ने रोग भएका व्यक्तिले ६ महिना नियमित र सर्ने रोग भएका व्यक्तिले एक बर्ष नियमित औषधि सेवन गरे रोग पूर्ण रुपमा निको हुने उहाँले बताउनुभयो ।
कुष्ठरोग निवारणको लागि जिल्लामा सुरू गरिएको अभियान सफल भएको क्षयकुष्ठ अधिकृत दुवाडीले बताउनुभयो । कुष्ठरोगको नियमित औषधि सेवन गरेर रोग निको भएकाले सरकारले प्रोत्सहान स्वरुप एक हजार दिने गरेको छ । औषधि खाएर कुष्ठरोग निको हुने भएपनि औषधि खाँदै गरेका र निको भइसकेकाहरुले पनि अङ्गभङ्ग हुनबाट बच्न दैनिक जसो सावधानि अपनाउनु पर्ने विज्ञहरु बताउँछन् ।
औषधि खाँदाखाँदै पनि समस्या आउने भएकाले नियमित रुपमा रोगी स्वास्थ्य संस्थाको सम्पर्कमा हुनुपर्ने क्षयकुष्ठ अधिकृत दुवाडीको भनाइ रहेको छ । कुष्ठरोगीहरुको समस्या सामधानको लागि पूर्वी चितवनमा कुष्ठरोगीहरुले समूह बनाएका छन् ।
‘स्थानीयस्तरमा आउने समस्यालाई समाधान गर्न समूह बनाइएको हो’, उहाँले भन्नुभयो, ‘औषधि सेवन नगर्ने, आर्थिक समस्या पर्ने अवस्था आए समूहमार्फत सामाधान गरिन्छ । कुष्ठरोगको औषधि सरकारले निःशुल्क वितरण गर्दै आएको छ ।