नारायणगढ । नेपालमा पछिल्लो केही दिनयता निर्माण सामग्रीमा अस्वाभाविकरुपमा मूल्य वृद्धि भएको छ । विशेषगरी, छड र सिमेन्टमा मूल्य वृद्धि भएको हो । अस्वाभाविकरुपमा मूल्य वृद्धि भएपछि आमउपभोक्ता मर्कामा परेका छन् । तर, के कारणले मूल्य वृद्धि भएको हो भन्ने विषयमा व्यवसायी नै अनभिज्ञ छन् । ‘मैले हार्डवेयर व्यवसाय गरेको १४ वर्ष भयो, यसरी अस्वाभाविक तरिकाले मूल्य वृद्धि भएको थाहा पाएको थिइनँ’, पाण्डव हार्डवेयर धर्मचोकका सञ्चालक कृष्ण खरेलले भने, ‘पहिलोपटक यतिधेरै मूल्य वृद्धि भएको थाहा पाएँ । अहिले के कारणले यसरी मूल्य वृद्धि भएको हो भन्ने हामीले नै थाहा पाउन सकेका छैनौँ ।’
अहिले छड प्रतिकिलो एक सय रूपैयाँको हाराहारीमा बिक्री भइरहेको उनले बताए । तिहारअघिसम्म प्रतिकिलो ७२ रूपैयाँमा बिक्री भएको छड अहिले ९८ रूपैयाँका दरले बिक्री भइरहेको छ । सिमेन्टमा पनि प्रतिबोरा ४० रूपैयाँ मूल्य वृद्धि भएको उनले बताए । पुस १ गते प्रतिबोरा १० रूपैयाँ मूल्य वृद्धि भएको सिमेन्टमा पुस १० गतेदेखि फेरि १० रूपैयाँ बढाएर एउटै बोरामा ४० रूपैयाँ वृद्धि गरेको उनले बताए । लकडाउनअघि ७२ रूपैयाँसम्ममा बिक्री गरेको छड अहिले एक सयको हाराहारीमा पुगेको छ भने पिपिसी सिमेन्ट प्रतिबोरा ६५० र ओपिसी सिमेन्ट प्रतिबोरा ७५० रूपैयाँका दरले बिक्री भइरहेको छ ।
निर्माण सामग्रीमा अत्यधिक मूल्य वृद्धि भएपछि व्यापारमा समेत गिरावट आएको व्यवसायीहरुले बताएका छन् । अत्यधिक मात्रामा मूल्य वृद्धि भएपछि हार्डवेयर व्यवसायमा करिब ३५ प्रतिशसम्म घाटा लागेको व्यापारीहरुको आँकलन छ । कोरोना महामारीको चपेटामा परेको व्यापारमा मूल्य वृद्धिले अर्को समस्या थपेको धौलागिरि हार्डवेयर हाकिमचोकका सञ्चालक विष्णु कँडेलले जानकारी दिए । ‘कात्तिकको २८ गतेसम्म ८० रूपैयाँ प्रतिकेजीमा बिक्री भएको छड अहिले ९८ रूपैयाँमा बिक्री गर्नु परेको छ’, उनले भने, ‘प्रतिकिलो १८ रूपैयाँको दरले मूल्य वृद्धि भएपछि व्यापारमा ठूलो असर परेको छ ।’ काम सुरू गरिसकेका उपभोक्तालाई जसोतसो काम सक्नैपर्ने बाध्यता भए पनि नयाँ निर्माण गर्ने उपभोक्ताले हाललाई थाती राख्ने गरेको उनले बताए ।
कारखानाबाटै मूल्य वृद्धि भएर आएकोले कुनै पनि व्यापारीलाई के कारण यति ठूलो अन्तरमा मूल्य वृद्धि भएको हो भन्ने जानकारी नभएको उनको भनाइ छ । उनका अनुसार पञ्चकन्या कम्पनीले प्रतिकिलो ९८ रूपैयाँ मूल्य तोकेर पठाएको छ भने हिमालको १०४ रूपैयाँ २३ पैसा तोकेरै पठाएको छ । ‘हामीले हिमाल कम्पनीको छड बेच्न सक्ने अवस्थामा छैन’, उनले भने, ‘अहिलेलाई पञ्चकन्याको मात्रै बिक्री गरिरहेका छौँ ।’
काम थालिसकेपछि भएको मूल्य वृद्धिले निर्माण क्षेत्रमा लगानी बढ्दा उपभोक्ता ठूलो समस्यामा परेको धर्मचोककी सावित्री सापकोटाले बताइन् । ‘सुरूमा ७४ रूपैयाँ किलोका दरमा झारेको छड अहिले ९८ रूपैयाँ प¥यो’, उनले भनिन्, ‘मूल्य वृद्धिले ढाड सेकिए पनि थालिसकेको काम रोक्न नमिल्ने, कस्तो अप्ठ्यारोमा परियो ।’ घर निर्माणको काम थाल्दा अनुमान गरेको खर्चको दोब्बरले पनि निर्माण सम्पन्न हुने छाँटकाँट नदेखेको उनले बताइन् ।
निर्माण सामग्री कम्पनीले भने नेपाली बजार भारतीय उत्पादनमा निर्भर रहनु, कोरोनाका कारण मजदुरको अभाव, कच्चा पदार्थकै मूल्य वृद्धिलगायतका कारण त्यसको असर नेपालमा परेको बताएको छ । ‘कोरोनाका कारण खानीमा काम गर्ने मजदुरको अभावमा उत्पादन नै कम हुँदा मूल्य वृद्धि भएको हो’, पञ्चकन्या स्टीलका रिजनल म्यानेजर गोपालप्रसाद वाग्लेले भने, ‘कोरोनाका कारण अधिकांश कम्पनीहरु घाटामा गएकोले पनि घाटा कम गर्न मूल्य वृद्धि गरेको हो ।’ तर, अहिलेको मूल्य वृद्धि स्वाभाविक नै रहेको उनको भनाइ छ । तत्काल घट्न सक्ने सम्भावना नरहे पनि माघ महिनाको अन्त्यतिर केही कम भई स्थिर रहन सक्ने अनुमान रहेको उनले बताए ।
Discussion about this post