रकमान्तर गरेर प्रधानमन्त्रीको क्षेत्रमा तटबन्ध

भरतपुर । आर्थिक वर्ष सकिन लाग्दै गर्दा बजेट रकमान्तरको आरोप खेपिरहेको सरकारले प्रधानमन्त्री सुशील कोइरालाले छाडेको चितवन क्षेत्र नम्बर ४ मा नारायणी नदी तटबन्ध गर्ने गरी बजेट रकमान्तर भएको छ । गुञ्जनगर गाविसको गाजीपुरमा नारायणी नदी नियन्त्रणका लागि अर्थ मन्त्रालयले दुई करोड रुपैयाँ रकमान्तर गरेर बजेट पठाएको हो । जुन बजेटले अहिले ५०० मिटर नदी तटबन्धको काम भइरहेको छ ।
‘प्रधानमन्त्री कोइरालाले छाडेको क्षेत्रमा बजेट रकमान्तर गरेर ल्याइएको छ’, सिँचाइ विभाग श्रोतले भन्यो, ‘बजेट जनताको तटबन्ध कार्यक्रममार्फत् खर्च भइरहेको हो ।’

जनताको तटबन्धन कार्यक्रमअन्र्तगत नारायणी नदीको तटबन्धका लागि सरकारले चालु आर्थिक वर्षका लागि ६ करोड रुपैयाँ यसअघि विनियोजन गरेको थियो । विनियोजित बजेट अपुग भएपछि स्थानीयले बजेट थप गर्न माग गरेका थिए । स्थानीयको मागअनुसार अर्थ मन्त्रालयले सो रकम रकमान्तर गरेर विनियोजित गरेको हो ।
‘नारायणीले बनाएकोे दुईवटा भंगालालाई नदी तटबन्धबाट एउटै बनाउने योजना हो’, स्थानीय उपभोक्ता समितिका अध्यक्ष बुद्धि तामाङले बिहीबार सञ्चारकर्मीसँग भने, ‘नदीको बहाब रोक्नका लागि बजेट थप गराइएको हो । अब नदी नियन्त्रण हुनेमा हामी विश्वस्त छौँ ।’
गत वर्ष पसेका दुईवटा भंगला रोक्ने गरी तटबन्ध भइरहेको छ । अध्यक्ष  तामाङले सो तटबन्धबाट  गुञ्जनगर, दिव्यनगर र मेघौली गाविसका बासिन्दा लाभान्वित हुने जनाए । जनताको तटबन्ध कार्यक्रमले चितवन र नवलपरासीको सिमानामा रहेको नारायणी नदीको तटबन्ध गर्दै आएको छ ।
चितवनतर्फ ३५ किलोमिटर र नवलपरासीतर्फ ६२ किलोमिटर तटबन्ध गर्न सकिएमा नारायणी नदीको बाढीबाट दुवै जिल्ला बचाउन सकिने योजनाका साथ जनताको तटबन्ध कार्यक्रम अघि बढाइएको हो । जनताको तटबन्ध कार्यक्रम भरतपुरका इञ्जिनियर शोभाकर पौडेलका अनुसार सो कार्यका लागि १० अर्ब ५१ करोड खर्च लाग्दछ ।
सो कार्यालयका प्रमुख तिलकबहादुर खत्रीका अनुसार हालसम्म दुवैतर्फ गरेर ११ किलोमिटर तटबन्ध गरिएको छ भने ४३ वटा स्पर निर्माण गरिएको छ । जसमध्ये चितवनतर्फ साढे छ किलोमिटर तटबन्ध गरिएको छ । जसका लागि ५७ करोड रुपैयाँ खर्च लागेको प्रमुख खत्रीले जानकारी दिए । यो तटबन्ध कार्यक्रम सफल भए चितवन र नवलपरासीको नारायणी नदी तटीय क्षेत्र ३५ हजार हेक्टर जमिन सुरक्षित हुने बताइएको छ ।
बजेट रकमान्तर भएर पनि नदी नियन्त्रण गर्न थालिएपछि सर्वसाधारण खुसी भएका छन् । स्थानीय बासिन्दाहरु भन्छन्, ‘अब नारायणी नदीले बर्षेनि दुःख दिने छैन ।’