चितवनका तीन पत्रकारको कृतिमाथि हेटौँडामा चर्चा

हेटौँडा । चितवनका पत्रकारहरु बसन्त पराजुली, सूर्यप्रकाश कँडेल र बिनोदबाबु रिजालका पुस्तकहरुमाथि शनिबार हेटौँडामा परिचर्चा भएको छ । बसन्तको कुमाता, सूर्यप्रकाशको मोसो र विनोदबाबुको एकान्तबासको परिचर्चा भएको हो ।
हेटौँडामा शनिबार राउन्ड टेवल गसिपले आयोजना गरेको कार्यक्रममा पत्रकार बसन्तको कुमातामाथि निमेष निखिलले, सूर्यप्रकाश कँडेलको मोसोमाथि घनश्याम घिमिरे र विनोदबाबुको एकान्तबासमाथि शान्तिप्रिय बन्दनाले टिप्पणी गरेका हुन् ।
चितवनका पत्रकार विनोदबाबु रिजालले कोरोना भाइरसका कारण गरिएको लकडाउनका अनुभूति संगालेर लेखेको पुस्तक ‘एकान्तवास’ कृति युरेका पब्लिकेसनले प्रकाशन गरेको हो । उक्त कृतिमाथि चर्चा गर्दै साहित्यकार शान्तिप्रिय बन्दनाले पुस्तक कोरोना कालको दस्तावेज भएको बताइन् । उनले पुस्तकमा चैत ८ देखि असार १ गतेसम्मका मुख्य घटनाक्रम, तथ्याङ्क र अनुभूतिलाई समावेश गरिएको बताइन् । पुस्तकमाथि बोल्दै उनले भनिन् ‘घटनाक्रमका धेरै विषय दोहोरिएको र पुस्तकमा रोचकता कम पाइएता पनि एउटा ऐतिहासिक दस्तावेजको रुपमा भएकोले मह¤वपूर्ण हुनेछ ।’
त्यस्तै, सूर्यप्रकाश कँडेलद्वारा लेखिएको मोसो उपन्यास पत्रकारिताका नाममा हुने विकृतिका बारे विषय उठान गरिएको कृति हो । उपन्यास मोसोको घनश्याम घिमिरेले चर्चा गरेका हुन् । घिमिरेले पुस्तकको विषयवस्तु उत्कृष्ट रहेको तर कैयन स्थानमा विषय दोहोरिएका र भाषागत त्रृटि रहेको बताए । घिमिरेले पुस्तकमा पत्रकारिताभित्रका विकृतिबारे गहिरोमा जान नसकेको बताए । गम्भीर विषयलाई पक्रेर पनि गम्भीर ढंगले नै पस्कन नसकेकोले उपन्यास सोचेजति आकर्षक बन्न नसकेको घिमिरेले टिप्पणी गरे । ‘सामान्य पत्रकारको रिपोर्टिङको स्तरभन्दा माथिल्लो कलात्मकताको माग उपन्यासले गर्दछ जुन यस उपन्यासमा पाउँदैनौंँ ।’ घिमिरेले आलोचनात्मक टिप्पणी गरेका हुन् ।
यस्तै, चितवन बसेर लामो समयदेखि पत्रकारिता क्षेत्रमा सक्रिय रहँदै आएका बसन्त पराजुलीको पहिलो कथासङ्ग्रह ‘कुमाता’ साहित्य संगम मकवानपुरका अध्यक्ष निमेष निखिलले टिप्पणी गरेका छन् । निमेष निखिलले सङ्ग्रहभित्रका सबै कथा सामाजिक यथार्थ परक र रोचक रहेको बताए । मन तान्ने र धेरै बेर सोच्न बाध्य बनाउनेसमेत रहेको उनले बताए । टिप्पणी गर्दै उनले भने, ‘कथासङ्ग्रहमा संग्रहित पहिलो कथामा एक पत्रकार रिपोर्टिङमा दिनरात नभनी खटिनुपर्ने, समाचार बनाउँदाका ज्यान मार्नेसम्मका धम्की र जोखिम, न्याय खोज्दा नपाउनु, न्यून पारिश्रमिक त्यो पनि समयमा नपाउनु आदि आम पत्रकारका वास्तविक पीडालाई देखाइएको छ ।’ उनले कृतिको शीर्षकअन्तर्गत रहेर टिप्पणी गरेका थिए । निखिलले कथामा नवीन प्रयोग नभएको भन्दै थोरै आलोचनासमेत गरेका छन् । परम्परागतरुपमा रहेका कथाका शैलीलाई आगामी कृतिमा नयाँ प्रयोग गर्न सुझाव दिएका हुन् ।
कार्यक्रममा मकवानपुरका प्रमुख जिल्ला अधिकारी गोविन्दप्रसाद रिजालले प्रमुख आतिथ्यता रहेको थियो । सञ्चारकर्मी तथा साहित्यकार राम अविकासको संयोजकत्वमा भएको कार्यक्रम र साहित्यकार छवि अनित्यले सञ्चालन गरेका थिए ।