भरतपुरलाई उपमनपा बनाउने तयारी, फोटो केही गाविस सहमत, केही असहमत

दिपेन्द्र अधिकारी
भरतपुर । भरतपुर नगरपालिकावरपरका तीन गाविसले यस नगरपालिकामा गाभिनका लागि लिखित सहमति जनाएका छन् । रत्ननगर नगरपालिकामा भने बछौली गाविसमात्र गाभिन तयार देखिएको छ ।
गीतानगर, मंगलपुर र फूलबारी गाविसले भरतपुर नगरपालिकामा गाभिने सहमति गरेको जिल्ला विकास समिति चितवनका प्रशासकीय अधिकृत पुरुषोत्तम शर्माले बताउनुभयो । त्यस्तै रत्ननगर नगरपालिकामा छिमेकी गाविस बछौली गाभिन तयार भएको उहाँको भनाइ छ । यी गाविसले जिल्ला विकास समितिमा सहमतिको पत्र बुझाएका छन् ।
रत्ननगर नगरपालिकालाई उपमहानगर बनाउने प्रस्तावका लागि बछौलीसहित पिठुवा र जुटपानी पनि गाभिन अनुरोध गर्दा यी दुई गाविसले सहमति दिएका छैनन् । यसअघि जिविसले दुई वटै नगरपालिकामा गाभिनका लागि छिमेकी ३÷३ वटा गाविसलाई अनुरोध गरेका थिए ।
हाल रु.नौ करोड बजेट रहेकोमा उपमनपा बनेपछि ३० करोड हुनेछ । विसं २०६८ सालमा नयाँ नगरका लागि खैरहनी र चित्रवन सिफारिस गरिएकोमा यस वर्षमात्र ती नगरपालिका घोषणा भएका छन् ।
सहमतिपत्र बुझाएपनि गाविसहरुले वडा नम्बर विभाजन भने आफूहरुले भनेअनुसार हुनुपर्ने बताएका छन् । गीतानगर गाविसको गत २२ गते बसेको पूर्ण बैठकले ३ वटा वडाको सिफारिस गरेको छ । वडा नम्बर १, २ र ३ लाई १ नम्बर, ४, ५ र ६ लाई २ नम्बर तथा ७, ८ र ९ लाई ३ नम्बर वडा बनाउनुपर्ने यस गाविसको माग छ ।
त्यस्तै फूलबारी गाविसले भने पुरै गाविसलाई एउटा वडा बनाउनुपर्ने माग अघि सारेको छ । त्यस्तै भरतपुर नगरपालिकासँग सिमाना जोडिएका कविलास, पदमपुर र केही दूरीमा रहेका शिवनगर र पटिहानी गाविसले गाभिने संकेत गरेको नगर प्रमुख नारायण सापकोटाले बताउनुभयो । गाविसहरुले स्थानीयस्तरमा जनतासँगको छलफलपछि उक्त सहमतिको चिठी जिविस चितवनमा पेश गरेका हुन् ।
यसअघि गीतनागर, मंगलपुर र फूलबारी फरक नगरपालिका बन्ने तयारीमा रहेपनि अन्ततः भरतपुर नगरपालिकासँग गाभिन तिनीहरु सहमत देखिएका छन् । जिल्ला विकास समितिले नगरपालिकामा गाभिन चाहनेको आवश्यक छलफलपछि मन्त्रालयमा सिफारिस गर्नेछ ।
निकट भविष्यमै उपमहानगरपालिका बन्ने तयारीका साथ अघि बढेको यस भरतपुर नगरपालिकामा अन्य गाविसले पनि समाहित हुने इच्छा देखाएको कार्यकारी अधिकृत नारायण सापकोटाले बताउनुभयो । नगरपालिकाले उपमहानगरपालिका हुनका लागि सम्पूर्ण पूर्वाधार तयार भएको जनाएको छ ।
विश्वविद्यालय, साक्षरता दर, आन्तरिक आय, विद्युतीकरणलगायतका सूचक आवश्यकभन्दा माथि रहेको प्रमुख सापकोटाले बताउनुभयो । हाल जिल्लामा भरतपुर, रत्ननगर, चित्रवन र खैरहनी नगरपालिका छन् । चित्रवन र खैरहनी एक महिनाअघिमात्रै नयाँ नगरपालिका घोषणा भएका हुन् । नयाँ नगरपालिकामा कार्यालय स्थापना र केही कामसमेत सुरु भइसकेको छ ।